Йошкар-Олаште «Школа гемофилии» семинарым эртареныт. Тушко Йошкар-Оласе, Москосо да Санкт-Петербургысо медорганизаций-влакын еҥышт ушненыт. Мероприятийым Гемофилий тӱнямбал обществын Марий Элысе организацийже ямдылен.
Гемофилий – вӱр чер, тудын годым вӱрын мален кертдымылан кӧра тудо шуко йога.
Физиологий могырым ончалаш гын, вӱр малымаш моткоч неле процесслан шотлалтеш, тушко лу наре лӱмын белок ушна. Организмыште вӱр удан мала гын, тудо чогашыл ден йыжыҥыш логалеш, тыгак пӱчкылтмӧ але удыралтме годым йогымым чараш ок лий.
Гемофилий дене шукыж годым пӧръеҥ-влак орланат, туге гынат ты чер тукым гыч тукымыш ӱдырамаш гоч кусна. Тазалыкым аралыме тӱнямбал организацийын статистикыж почеш, 5000 эрге аза кокла гыч иктыже гемофилий черан шочеш. Нунын кокла гыч кумшо ужашыже ген-влакын йоҥылыш мутироватлымыштлан кӧра черлана, тыгай йочан ешыштыже тиде чер дене тылеч ончыч иктат орланен огыл.
Российыште гемофилийым пытартыш жапыште лукмо медицине препарат дене эмлат. Тидын нерген семинарыште Морозовский клинический йоча эмлымверын (Моско ола) гематологий пӧлкажым вуйлатыше И.Н.Лаврентьева каласкален.
Гематологий да трансфузиологий шотышто Российысе шанче-шымлыме институтышто (Федеральный медико-биологический агентстве, Санкт-Петербург) хирургический пӧлкам вуйлатыше В.Е.Солдатенков гемофилийын неле формыж годым чӱчкыдын вашлиялтше симптом-влак (чогашылыш да йыжыҥыш вӱр йогымылан кӧра лекше нелылык) дене палдарен.
Гемофилий тӱнямбал обществын Марий Элысе организацийжым вуйлатыше А.П.Морозов организацийын пашаже, пациент-влак дене кылым кучымо (цифровой коммуникаций-влак полшымо денат) нерген каласкален.
Интернет гыч налме фото.