Морко посёлкышто илыше Инна Алексеева «Воштылаш, товатат, сулык огыл!» конкурсыш 1997 ийыште икымше гана ушнен. Тунам икымше курсышто тунемше студентке лийын.
Тылеч вара кажне ийын гаяк мыскара номер дене сценыш лектын, тудлан кумылаҥдыше пӧлек-влакым эре кучыктеныт. А визымше курсышто тунеммыж годым Инна кумшо верым налын. Пӧлек шотеш «Плёс» фирме деч газплитам пуэныт. Тудым И.Алексеева аважлан ялыш наҥгаен пуэн.
– Мыскара конкурсышто икымше гана «Марийым кычалам» номер дене сценыш лектынам. Тыгак «Футболист», «Лизук», «Моторлык салонышто» номер-влак лийыныт. Монолог-влакым шке келыштаренам. Сергей пелашемат ойсавыртыш-влакым ешарен, текстыш пурташ темлен. Конкурс годым шуко артист, мурызо-влак дене палыме лийынам, ик сценыште пырля мастарлыкым ончыктымо. Тидын нерген оҥай фото-влак шарныктат, – каласкала И.Алексеева.
И.Алексееван альбомжо гыч налме фото.