Россий Президент Владимир Путинын шындыме ик задачыже – 2030 ий марте элыштына 1,6 млн суртыш газым пуртыман. Заседанийыште 2025 ийыште догазификаций йӧным шуктымо да 2026 ийыште тудым шуйымо нерген, регионлаште программым 2030 ий марте шуктымо нерген ойленыт.
– Догазификаций программым илышыш шыҥдарымаш республикнан экономикыжлан, чоҥымо отрасльым вияҥдаш да экологийым саемдаш полша, – ик гана веле огыл ондак ойлен регионым Вуйлатыше.
Марий Элыште догазификаций йӧн почеш паша элысе кокла показатель деч шукырак ышталтын. Тений 22 январьысе данный почеш, 10 тӱжем йодмаш пурен, тышеч 9000 утла еҥын йодмыжым шуктымо (89% процент договор почеш газым пуртымо). Сад участкылаште илыше-влак 283 йодмашым возеныт, кызытеш 79 вере паша ышталтын.
Поснак кугу тӱткыш социальный газификацийлан ойыралтеш. Тудын почеш социально-кӱлешан объектлашке газым оксам тӱлыде пуртат, мутлан, ФАП ден тунемме организацийлашке. Тидыже тӧнеж-влаклан пашам ышташ сай йӧным ышта да калыкын илыме качествыжым саемда.
2023-2024 ийлаште тиде программе почеш республикысе кум ФАП ден кандаш образовательный организаций (куд школ ден кок йочасад) газ дене пайдаланаш тӱҥалыныт.