Шернур район Койсола клуб пелен «Ӱжара» мурышо да куштышо калык ансамбль уло. Тудо республикысе районлашке концерт дене чӱчкыдын коштеш, тӱрлӧ конкурслаште шке вийжым терга.
Тиде коллективым чумыраш Марий Эл Республикысе тӱвыран сулло пашаеҥже Л.Бердникова кугун полшен. 1975 ийыште Лидия Васильевна Койсола клуб пелен хорым поген. Эркын программым пойдарымеке, концертым ончыкташ тӱҥалыныт. Калыклан мероприятий чот келшен, келге шарнымашым коден. 1983 ийыште клубышко самырык хореограф Валентина Лучкова толын да куштышо коллективым поген. 1987 ий апрельыште мурышо да куштышо «Ӱжара» ансамбльлан калык лӱмым пуэныт. Тидыже пашам сайынрак ышташ кумылаҥден. Ансамбльыште ӱдыр-рвезе-влак вашталтын шогеныт гынат, коллективыште еҥ ситен. «Эр ӱжара» куштышо ансамбль самырык-влакым туныктенак шога.
«Ӱжара» ансамбль Шернур посёлкысо А.Ф.Конаков лӱмеш тоштер дене пеҥгыде кылым куча. Ятыр гана тора кундемла гыч толшо уна-влаклан марий сӱан йӱлам ончыктеныт. Мутлан, Нижний Новгород, Моско олала, Финляндий гыч толын каеныт. Тылеч посна ансамбльын шке ойыртемже уло – Койсола сӱан сем. Тудым ме радио денат колына. Мурым Валерий Семёнов мура. Икмыняр ий ончыч Йошкар-Ола гыч марий сӱаным войзаш толыныт. Ансамбльын участникше-влак тыгак тушто мурен-куштеныт. Тыгак 2019 ийыште шошым Морко район Унчо селаште эртаралтше «Ӱярня» пайремыш миен коштыныт. Кызыт Йошкар-Олаште шошым эртаралтше «Салют Победы» фестивальлан ямдылалтыт.
– Гармонист укелан кӧра репетиций-влак шуэн эртаралтеш. Иктаж кугу пайремлан ямдылалтмына годым Шернур посёлкысо тӱвыра пӧрт гыч Алексей Гориновым ӱжына. Тудо мыланна эреак полша. Укеж годымжо фонограммылан эҥерташ логалеш, но пеш йӧндымӧ, – ойла клубым вуйлатыше Алиса Куклина.
Тудо Койсола клубым 2017 ий ноябрь годсек вуйлата. Алиса ты кундемыштак шочын-кушкын. Ансамбль-влак дене Марий Эл Республикысе тӱвыран сулло пашаеҥже Валентина Евгеньевна Лучкова пашам ышта. «Ӱжара» ансамбльыш кызыт 14 еҥ коштеш.
Чыла нелылыкым чытен, кумло кок ий ондак тӱҥалме пашам тачат шуктат. Ӱшанена: илен-толын, гармонистат лиеш, коллективат пойдаралтеш. Тек коллектив умбакыжат ӱжара гай нӧлталтше.