6 декабрьыште Йошкар-Олаште Россий Армий тӱвыра полатыште Василий Тёркинын кубокшо верч гармоньчо-влакын конкурсышт кокымшо гана эртаралтын.
Тений тудо тӱнямбал кӱкшытан лийын. Конкурсыш Белоруссий гыч гармоньчо-влак толыныт. Минск областьысе Оношки агроола гыч «Аношкаÿскiя музыкi» гармоньчо-влакын образцовый ансамбльышт ончышо-влакым куандарен.
Нунын деч посна конкурсышто эше ныл команде лийын: И.С.Палантай лӱмеш тӱвыра да сымыктыш колледжын, Параньга, Шернур районласе гармоньчо-влакын командышт, Советский район Кельмаксола тӱвыра пӧртын «Мари гармонь» калык семӱзгар ансамбльже.
Сеҥыше-влак:
- 1-ше вер да тӱҥ приз – Кубок, тыгак у гармонь Беларусь Республик гыч толшо уна-влак лан логалын.
- 2-шо верыш Шернур районын гармоньчыжо-влак лектыныт.
- 3-шо верыште – И.С.Палантай лӱмеш тӱвыра да сымыктыш колледжын командыже.
Участник-влак тӱрлӧ ийготан лийыныт. Коклаштышт самырык-влакым ужаш поснак куанле ыле. Тугеже гармонь ила, йӱкшӧ дене кугурак тукымым веле огыл, самырык-влакымат сымыстара.
Россий Армий тӱвыра полатын ВК-се лаштыкше гыч налме фото-влак.
