Гармонь, тӱмыр йӱк дене

Эльвира Терентьеван фотожо.

25 апрельыште Марий тӱвыра рӱдер Марий самырык театрын сценыштыже «Сӱан толеш! Сӱан толеш!» усталык апшаткудым эртарен. Тудым Марий талешке кечылан да тений Российыште калык-влакын тӱвыра поянлыкыштлан пӧлеклыме.

Ты мероприятий театрын фойештыже сӱан такмакым йоҥгалтарыме дене тӱҥалын да тыгакак мучашлалтын. Чынак, сӱан гын сӱан семынак гӱжлыман! Ожно тудо Шернур, Марий Турек районлаште йӱд мучко шуйнен, а эрдене эрак оръеҥым мелнам кӱэшташ але шукыж годым шудо солаш наҥгаеныт. Тиде мероприятийым почмеке, тӱрлӧ кундемысе марий сӱанын ойыртемже-влак дене палдарыше «Свадебные обряды марийцев» книган презентацийже лие. Савыктышым В.М.Васильев лӱмеш МарНИИЯЛИ ямдылен луктын. Тудын нерген институтын научный пашаеҥже, этнолог Ольга Калинина каласкален.

Тӱрлӧ кундем гыч толшо тӱвыра пашаеҥ-влак сӱанын шым йӱлажым кумдан почын пуэныт.

Марий сӱанын ончыкылыкшо тургыжландара, вет яллаште марий сӱан шагалрак. Но тыгодымак ансамбльлаште тӱмырым кырен моштышо самырык еҥ-влакын улмышт шӱм-чоныш ӱшаным шава.

Тичмаш текстым «Кугарня» газетыште лудса.