🩰Э.Сапаев лӱмеш опер да балет театрыште кумдан палыме руш балерине Галина Улановалан пӧлеклалтше XXIII балет фестиваль почылтын.
Торжественный мероприятийыште Марий Элым Вуйлатыше Ю.Зайцеват лийын. «Марий балет кундемнан «визитный картычкышкыже» савырнен, тудым Российыште веле огыл, йотэллаштат палат», – палемден тудо.
Фестиваль 2002 ий годсек эртаралтеш. Тӱрлӧ ийлаште элнан рӱдолаж гыч толшо артист да тӱнямбал шӱдыр-влак сценыште мастарлыкыштым ончыктеныт. Теният Кугу театрын вич солистше фестивальыш ушнен. Тыгак Мариинский театрын, «Кремлёвский балет» театрын, Челябинск оласе М.И.Глинка лӱмеш опер да балет театрын примашт да премьерышт спектакльлаште модыт. Мероприятийын посна унаже – «Донбасс» мурымаш да куштымаш сулло кугыжаныш академический театр.
Индеш кечыште театрын сценыштыже эн сай коллектив-влак выступатлат, тыгак мастер-класс-влак эртаралтыт, палыме артист да хореограф-влак дене вашлиймаш-влак лийыт.
Марий Элым Вуйлатышын пресс-службыжын фотожо-влак.