Йошкар-Олаште илыше ветеран-влаклан «Фронт бригаде-влак» пӧлекым ыштат!
Сеҥымаш кече вашеш Кугу Ачамланде сарын ветеранже-влакым пагалымашлан пӧлеклалтше акций ий еда эрта. Школышто тунемше да усталык коллектив-влак, геройын окна йымакше толын, тудлан мурым йоҥгалтарат да почеламутым пӧлеклат, тыгак стройышто сайын шогымыштым ончыктат.
Теве теҥгече Сеҥымашын XXX идалыкше лӱмеш тӱвыра полатын коллективше да «Созвучие сердец» ансамбльын участникше-влак (вуйлатыше – Лилия Алексеева) Алексей Андреевич Невидицыным Сеҥымаш кече дене саламленыт.
