21-29 июльышто Самара областьыште самырык-влакын «iВолга-2022» форумышт эртаралтеш.
20 июльышто 20 шагатат 30 минутлан Йошкар-Олаште Марий Элысе участник-влакым торжественно ужатат. Мероприятийыш Марий Эл правительстве вуйлатышын икымше алмаштышыже Михаил Васютин, Марий Эл Республикысе спорт, туризм да молодёжный политике министр Лидия Батюкова, кӱшыл шинчымашым пуышо заведений-влакын ректорышт да проректорышт толыт.
«iВолга» форум Юл кундем федеральный округыш пурышо тӱрлӧ кундемласе самырык-влакым пырля чумыра. Форумышто нуно шке возымо проектыштым аралаш тӱҥалыт.
Тений чылажге 20600 йодмаш 77 Россий Федерацийын субъектлаж гыч пурен. Тышеч 1900 еҥже гына Самара областьыш кудалеш. Участник-влакым Мастрюковский ерлаште улшо «Фестивальный паркыште» вераҥдат.
Форумышто Марий Элын чапшым Волгатехын, МарГУн, МОСИн студентше-влак, тыгак пашам ыштыше ӱдыр-рвезе-влак ден школышто тунемше-шамыч аралат.