Республикысе мер полыш штабыште «Единый Россий» партийын первичный пӧлкаже-влакын форумышт эртаралтын.
Тушто Марий Элым Вуйлатыше Ю.Зайцев, Федераций Советыште Марий Эл Республик деч представитель К.Косачев, Совет Федераций Советыште обороно да лӱдыкшыдымылык шотышто комитет председательын икымше алмаштышыже С.Мартынов, депутат-шамыч, партийын верысе ден первичный пӧлкаж-влакын секретарьышт лийыныт.
Марий Элыште партийын 550 первичный пӧлкаже пашам ышта. Тудо 14 тӱжем еҥым ушен шога.
Форумым почмо годым Ю.Зайцев первичный пӧлка-влакын надырыштым палемден. Ешарен: 2024 ийым «Единый Россий» партийын председательже Дмитрий Медведев первичный пӧлка-влакын идалыкышт семын увертарен.
Первичный пӧлка-влак деч кучемысе органлашке кундемыште илыше-влак деч нелылык шотышто тӱрлӧ йодыш ден темлымаш-влак пурат. «Тиде вашкыл регионым, тыгак элнам вуйлатышылан нелылыкым кораҥдаш писын, качественно, а тӱҥжӧ – адресно полша. Тыглай еҥ-шамычын, варажым партийын первичный пӧлкажын каласыме проблемыштым кугыжаныш орган-влак шотыш налыныт, кызыт нуно шукталтыт», – каласен Ю.Зайцев.
К.Косачев первичный пӧлка-влакын миссийышт нерген ойлен. А С.Мартынов палемден: «Президентын посланийыштыже еҥ-влакын социальный гарантийыштлан, элнам аралымылан да ешлан кугу вер ойыралтын. Первичный пӧлка-влакын секретарь ден активистышт федеральный кӱкшытыштӧ ямдылыме инициативым да партийный проект-влакым илышыш шыҥдараш полшат».
Эльвира Терентьева.
Д.Речкин/ Марий Элым Вуйлатышын пресс-службыжо.