Физкультурникын кечыже вашеш

Фотом i-ola-visit.ru сайт гыч налме.

13 августышто Йошкар-Оласе «Дружба» стадионышто физкультурникын кечыжым палемдат.

10 шагатлан пайремым торжественно почыт. 10 шагатат 30 минутлан баскетбол дене «Оранжевый мяч» таҥасымаш лиеш. 11 шагатлан Марий Элысе спорт туризмын «Северная ходьба» дисциплиныж дене фестиваль эртаралтеш. Ты жапыште Арена Марий Элыште начар тазалыкан еҥ-влак коклаште «Выше, дальше, сильнее» фестиваль лиеш гын, Сеҥымаш паркыште workout да ОФП дене ӱчашымаш. 13 шагатлан «Дружба» стадионышто пӧръеҥ-влак коклаште футбол дене чемпионатым, айкидо дене кубокын кокымшо йыжыҥжым эртараш палемдыме. 15 шагатлан футбол дене мастер-классым, функциональный тренинг да «Акпарс-МАРГУ» армрестлинг дене выступленийым ончыктат.  16 шагатлан пӧръеҥ-влак коклаште Марий Эл Республикын 2022 ийысе суперкубокшо эрта. 19 шагатлан Патриарший площадьыште «Ola Salsa» куштымо студий бачата да сальса куштымашым туныкташ тӱҥалеш. Тыгак Марий Элысе спорт куштымаш федераций мастер-классым эртара.