Фитнес паша дене чаплана

Параньга район Памашъялыште шочын-кушшо, кызыт Санкт-Петербургышто илыше Мария Романова фитнес-модельлан тырша, тидын шотышто тренер сомылымат шукта. Тудо ончыч чирлидинг дене заниматлен, кызыт бодибилдинг дене кылым куча. Тений бодибилдинг дене Российысе, тӱнямбалысе чемпионатлаште таҥасен.

Чирлидинг дене ойыртемалтын

Мария йоча жапше годсек спортым йӧрата. Кугу Пумарий школышто тунеммыж годымак писын куржталыштын, ече дене талын мунчалтен, туризм дене заниматлен. Школын чапшым тӱрлӧ таҥасымаште ик гана веле огыл нӧлтен.

Илышыжым кӱлешан профессий дене кылдаш шонен, школ деч вара Политехышке (Волгатех) экономический факультетыш тунемаш пурен. 5-ше курсышто чирлидинг дене заниматлаш кумылаҥын. Мо оҥайже: ты видышке иканаште куштымаш, гимнастике да акробатике пурат.

– Тунам куштымем шуын. Тыгодым спорт дене кылым кучаш шоненам. А чирлидингыште чыла тидыже уло. Йошкар-Оласе «Феникс» командышке кошташ тӱҥальым. Чирлидинг дене тӱшкан заниматлат, тудо «группо поддержке» манмылан шотлалтеш. Ме тушто куштена, акробатический упражнений-влакым ыштенна. Озаҥысе универсиадыште волейбол турнирлаште волонтёр семын тыршенна, – мане М.Романова.

Паша корно – Москошко, Питерышке

Дипломым налмеке, Мария Москошко илаш куснен, тушто бухгалтерлан пашам ышташ тӱҥалын. Тыштат тудо чирлидинг дене пеҥгыде кылым кучен. Москосо «Dream Team» командышке коштын.

– Тренер Екатерина Хейфецын командыштыже шкем вияҥденам. Тудын тӱрлӧ ийготан-влакым ушышо шуко командыже уло. «Dream Team» команде дене ме Озаҥ, Иваново, Моско, Великий Новгород олаласе соревнованийлаште таҥасенна. 2011 ийыште ты вид дене «Спорт мастерыш кандидат» лӱмым сулен налынам, – пелештыш Мария.

А Санкт-Петербургышко илаш куснымеке, М.Романова шке семын куржталаш тӱҥалын. Тӱрлӧ кужытым эртен, любительский таҥасымашлашке ушнен. Тудо 2 меҥге гыч тӱҥалын 42 меҥге марте кужытан дистанцийлаште ӱчашен. Мария Санкт-Петербургышто, Москошто, Озаҥыште, Йошкар-Олаште эртыше таҥасымашлашке ушнен, варажым Израильыште, Тель-Авив олаште, эртыше тӱнямбал марафонышто куржын.

Самырык тренер

2019 ийыште Мария Романова фитнес-модель семын тыршаш тӱҥалын, бодибилдинг манме спортын видше дене заниматла. Фитнес-тренерлан тунем лектын, шкенжын капкылжым пеҥгыдемда, тыгак еҥ-влаклан тренировко-влакым эртара.

Умбакыже 24 декабрьысе газетыште лудса. Кевыт