16 октябрьыште Финляндийын рӱдолаштыже, Хельсинкиште, Финн-угор тӱвыра кечым палемденыт. Пайремыш карел, финн да марий-влак погыненыт.
Пайрем кас тӱҥалтыште марий документальный фильмым ончыктеныт, вара концерт лийын. Марий-влак кокла гыч шке мастарлыкшым мурызо Надежда Пашкина ончыктен.
– Пайремыш марий-влак ятырын толыныт. Мый кум марий калык мурым: «Жаплан веле кече лектеш», «Ачажын тувырым чиялын», «Эх, Калтаса» да шке репертуарем гыч «Йӧратымемлан» мурым муренам. Пайремыште финн-влак моткоч ӧрыктарышт. Татар, карел, удмурт йылмыла дене мурымеке, нуно «Йӱржӧ йӱреш» мурым чот сылнын мурышт! Финн ансамбльын участникше-влак музыклан лӱмын тунемын огытыл, туге гынат вес йылме дене мурымышт келшыш, – каласыш тудо.
«Арнян вӱршерже» лаштыкым И.Александрова, Н.Моисеева, Э.Терентьева ямдыленыт.
Моло уверым 22-шо октябрьыште лекше газетнан 43 № -ыште лудса.