Пытартыш ийлаште сылнымут пашаште финн-угор калык-влак кокласе келшымаш кыл молгунамсе деч виянракла чучеш. Писатель-влак икте-весыштын пашаштым шочмо йылмышкышт кусарат, посна книга дене савыктен луктыт.
Финн-угор тӱшкаш пурышо кажне калыкын сылнымутшо шкешотан. Тидым ме шукерте огыл лекше «Лышташ велалтме годым» книгаште ужын кертына.
Тиде сборникыш 13 калык гыч лекше 64 поэтын сылнымут саскаже-влак пуреныт. Марий йылмышке нуным поэт Альберт Васильев кусарен.
Книгам Финляндийысе М.А.Кастрен ушемын полшымыж дене лукмо.
Сборникыш пурышо икмыняр почеламут дене газетнан 2 апрельыште лекше номерыштыже палыме лийын кертыда.