Октябрь тылзын кумшо арнянже Родо-тукым финн-угор калык-влакын кечышт эртаралтеш. 18 октябрьыште ты школышто тидлан пӧлеклалтше мероприятий лие.
Эн ончычак актовый залыште тунемше-влак марий койышым ончыктышт. Моркысо йоча сымыктыш школышто тунемше да «Калинка» куштышо образцовый ансамбльыш коштшо ӱдыр-шамыч сылне сӱан вургемым, рашрак каласаш гын, рывыжупшым да ужар мыжерым, чиен, Шернур вел сӱан куштымашым ончыктеныт. «Финн-угор – тый да мы» почеламутым А.Алексеев ден Д.Валиева шергылтарышт. У.Григорьева скрипке дене сылне семым шоктен.
А варажым 8-ше классыште тунемше-влаклан оҥай урок эртаралтын. Тушто марий йылмым туныктышо С.В.Никитина финн-угор калык-влак нерген презентацийжым ончыктен. Тылеч вара англичан йылмым туныктышо С.П.Мерзлякова удмурт вургемым чиен толын да шочмо удмурт йылмыж дене ойлен, тыгак удмурт калыкын пайремже, кочкышыжо нерген каласкален.
– Ме финн-угор калык-влак дене палдарыме годым уроклаште видеоурок-влакым кучылтына, «Тидым палет мо?» викториным эртарена, йоча-влакын шонымашыштым сӱрет конкурслаште рашемдена. Тидыже родо-тукым калык-влакым пагалымашым шочыкта, – мане София Васильевна.