Йошкар-Олаште «Бизнес-спринт (Я выбираю спорт)» федеральный проектлан кӧра спортын йӱлаш пурышо да цифровой видше дене заниматлаш фиджитал рӱдерым ыштат.
Кундемыштына фиджитал направленийым вияҥдыме нерген пунчалым республикыш Россий Правительстве Председательын алмаштышыже Д.Чернышенкон толмыж годым лукмо. Ты спорт объектым ышташ 105 млн теҥгем ойырымо. Рӱдер «Ий полат» воктене верлана. Проектым шуктышаш подрядчик пале.
Фиджитал рӱдерыште компьютерный зал ден виртуальный реальность зоно, мини-футбол ден стритболлан универсальный вер, турникан, брусан да шведский пырдыжан воркаут-зоно, трибуно-влак лийыт.
Ты проект – Марий Элысе спорт инфраструктурышто кӱлешан ошкыл. Тудо самырык-влаклан у йӧным пуа. Классический ден киберспортым йӧратыше-влакым иктыш уша да тренировко-шамычым эшеат оҥайым ышта. Тыгак фиджитал рӱдерым салтак-шамычын реабилитацийыштлан кучылташ тӱҥалыт.