27 мартыште, Театрын тӱнямбал кечын, Марий Элыште «Театральный Йошкар-Ола» фестивальым иктешленыт. Арня жапыште ончымо да аклыме спектакль-влакым Э.Сапаев лӱмеш опер да балет кугыжаныш академический театрын полатыштыже палемденыт. Тений жюри чылаже 11 постановкым аклен: «Бахчисарайский фонтан» балет, «Риголетто» опер, «Ший Пампалче» мюзикл, «Бабье лето» мелодраме, «Снеговик-почтовик» ден «Крокодил» йомак-влак, «Ӱмыр пелаш» да «Мӹндӹр цӓшӹн сотыжы» драме-влак, «Похождения Чичикова, или Мёртвые души», «Вечера на хуторе близ Диканьки» да «Окса тул» комедий-влак. Фестивальын Гран-прижым тений нигӧлан пуэн огытыл. Но посна номинацийлаште ойыртемалтше паша-влаклан пӧлекым кучыктеныт.
Эн сай режиссёр паша: Василий Пектеев – М.Шкетан лӱмеш Марий драмтеатр. (Ю.Байгузан пьесыже почеш шындыме «Окса тул» спектакль);
Эпизодысо эн сай роль: Светлана Сандакова – М.Шкетан лӱмеш Марий драмтеатр, Актрисан рольжо (Ю.Байгуза, «Окса тул»);
Эн сай сценографий: Борис Голодницкий – Г.Константинов лӱмеш академический руш драмтеатр (Н.Гоголь, «Вечера на хуторе близ Диканьки» комедий);
Драме спектакльыште эн сай пӧръеҥ роль: Дмитрий Шишмаков – Г.Константинов лӱмеш руш драмтеатр, Вакулан рольжо (Н.Гоголь, «Вечера на хуторе близ Диканьки»);
Алексей Сандаков – М.Шкетан лӱмеш Марий драмтеатр, Карасийын рольжо (Ю.Байгуза, «Окса тул»);
Кокымшо планан эн сай пӧръеҥ роль: Дмитрий Воронцов – Г.Константинов лӱмеш руш драмтеатр, Чёртын рольжо (Н.Гоголь, «Вечера на хуторе близ Диканьки»);
Артём Веденкин – Э.Сапаев лӱмеш опер да балет театр, Станиславын партийже (Б.Асафьев, «Бахчисарайский фонтан»);
Драме спектакльыште эн сай ӱдырамаш роль: Евгения Москаленкон, Людмила Мансурован да Юлия Охотникован триошт – Г.Константинов лӱмеш руш драмтеатр («А.Манчеллан «Бабье лето» пьесыж почеш шындыме спектакль);
Кокымшо планан эн сай ӱдырамаш роль: Зинаида Долгова – Марий самырык театр, Коробочкан рольжо (Н.Гоголь, «Похождение Чичикова, или Мертвые души»);
Оперыште эн сай партий: Алина Полевая – Э.Сапаев лӱмеш опер да балет театр, Джильдан партийже (Дж. Верди «Риголетто» опер);
Балетыште эн сай партий: Кристина Михайлова – Э.Сапаев лӱмеш опер да балет театр, Мариян партийже (Б.Асафьев, «Бахчисарайский фонтан»);
Екатерина Байбаева – Э.Сапаев лӱмеш опер да балет театр, Зареман партийже, (Б.Асафьев, «Бахчисарайский фонтан»).
Тылеч посна фестивальыште жюри икмыняр премийым шке лӱмжӧ дене пуэн. Тыге «Актёрский дуэт» премий дене Курыкмарий драмтеатрын актёржо-влак Николай Марышев ден Дмитрий Тораев (Ш.Шакурова, «Мӹндӹр цӓшӹн сотыжы» спектакль), «Дирижёр» премий дене Григорий Архипов (Э.Сапаев лӱмеш опер да балет театр), ӱдырамаш пӱрымаш темым почын пуымылан премий дене Марий самырык театрын актрисыже-влак Светлана Никитина ден Татьяна Попова (А.Петров, «Ӱмыр пелаш», Ольган рольжо) палемдалтыныт.
Ончышо-влаклан утларак келшыме призым Э.Сапаев лӱмеш опер да балет театрын актрисыже Екатерина Байбаева (Б.Асафьев, «Бахчисарайский фонтан», Зареман партийже) сулен, «За честь и достоинство» приз дене ты театрыштак пашам ыштыше Марий Элын калык артисткыже Светлана Сушкина палемдалтын.
Тыгак Российысе Театр пашаеҥ-влак ушемын Марий Элысе пӧлкан председательжын премийжым Нина Пектеевалан (ты ушемын председательын алмаштышыже), тиде ушемын «Творческая командировка» премийжым Г.Константинов лӱмеш руш драмтеатрын артистше Дмитрий Шишмаковлан, директорский премийым ты театрын пашаеҥже Дамир Закировлан да таумут кагазым Марий Кугыжаныш Университетын ректоржо Михаил Швецовлан кучыктеныт.