29 майыште Йошкар-Оласе Чарла кремльыште этно-группо да вокально инструментальный ансамбль-влакын регионысо IV фестивальышт эртаралтын. Тудо кок ийлан ик гана лиеш. Марий Эл, Татарстан да Чуваший гыч 13 коллектив погынен.
Фестивальыште гран-прим Курыкмарий район гыч Я.Эшпай лӱмеш калык тӱвыра рӱдер пеленысе «Аяр» группо налын. Группым Сергей Коротков вуйлата. Нуно 2018 ийыште гран-прим налыныт ыле.
«Вокально-инструментальный ансамбль» номинацийыште лауреат лӱмым налыныт: Йошкар-Ола гыч «Речкин-бэнд» (вуйлатыше Александр Речкин), Чуваш Республик Вурнар района гыч «Аса Ил» ВИА (вуйлатыше Денис Яковлев) да У Торъял тӱвыра пӧртысӧ «Эхо» ВИА (вуйлатыше-влак Сергей Мухин, Надежда Сидоркина, Дмитрий Афанасьев).
«Рок-группо» номинацийыште лауреат-влак лийыныт: Медведево район тӱвыра пӧртысӧ «Время пришло» группо (вуйлатыше Андрей Лебедев), Йошкар-Оласе «Легион» группо (вуйлатыше Дмитрий Жилов) да Оршанкысе тӱвыра пӧртысӧ «ПНП» лӱман группо (вуйлатыше Александр Онучин).
«Коллеге-влакын аклымышт» («Признание коллег») посна диплом дене «Аса Ил» чуваш ВИА палемдалтын.
«Кугарня» газет редакций фестивальым эртарыме годым вияш эфирым эртарен. Эфирым тыште ончаш лиеш.