С.Г.Чавайнын шочмыжлан 135 ий темме лӱмеш Национальный книгагудо 2-6 октябрьыште «Ото» литературный фестивальым эртара.
Икымше кечын «Вечно живое наследие» библиотечный марафон тӱҥалеш. 3 октябрьыште «Строки о главном… Поэзия Марийского края» литературный календарьын презентацийже лиеш. Тушто перекидной календарьыште 12 марий поэтын цитатыштым пуртымо. 4 октябрьыште «Новый старт. 55+» проектын участникше-влаклан икымше марий классикна нерген лекций лиеш, ты кечынак – Чавайнлан пӧлеклалтше литературно-музыкальный концерт.
5 октябрьыште В.М.Васильев лӱмеш МарНИИЯЛИ «Сергей Чавайн. Творчество. Личность» II всероссийский конференцийым эртара. Икмыняр секций пашам ышта.
Тыгак йодмо почеш кажне кечын экскурсий, йоча-влаклан «Вувер» поэме-йомак почеш сӱрет конкурсын ончерже лийыт.