20 мартыште Морко районышто Российысе йоча да самырык-влакын «Движение Первых» мер-кугыжаныш толкыныштын фестивальже эртаралте. Тушко районысо кажне школ гыч кугурак вожатый але школ директорын воспитатлыме паша шотышто алмаштышыже да кум эн чолга тунемше дене миеныт.
Фестиваль пайрем семын почылто. Тӱҥ шомак Морко муниципал район вуйлатыше, «Единый Россий» партийын верысе пӧлкажын секретарьже С.Ивановалан пуалте. Вара Морко муниципальный район вуйлатышын алмаштышыже А.Васильев икшыве ден туныктышо-влакым порын саламлыш. А регион кӱкшыт гыч «Движение Первых» толкынын председательже О.Мелентьева толын.
Тунемше-влак станцийла дене пашам ыштеныт. Мастарлык класслаште шке чолгалыкыштым шуареныт. Муро да куштымаш гоч шочымо элым йӧратымыштым, шке калыкын чын патриотшо улмым раш почын пуышт.
Ты фестиваль кажнын чоныш кугу ӱшаным пуртен. Илыш эре шолын шогышаш. Тудо саман вашталтмаш дене тӧр вияҥшаш. А самырык тукым чолга кушшаш. Тидланже «Движение Первых» толкын чылалан пеш кугу корным почеш.
Елена Григорьева, Шӱргыял школын вожатыйже.
Снимкыште: фестивальын участникше-влак.