2018 ий 14 мартыште Марий Эл Республикыште АККОР (Марий Элысе ялозанлык сатум ыштен лукшо, ялозанлык кооператив, кресаньык (фермер) озанлык-влакын ассоциацийышт) почылтын. Тунам 54 еҥ ты ассоциацийыш пурен. Марий Элысе АККОР-ын председательже – У Торъял районын шочшыжо Григорий Александрович Петров-Чоткар. Тудо кресаньык озанлык-влак ваш келшен да паша лектышышт дене икте-весылан полшен шогымышт верч азаплана, садлан талукат пеле ончыч АККОР вийым налын.
24 апрельыште Морко районышко ойырымо льготан кредитым, грант полышым налме, квалификацийым нӧлтымӧ йодыш дене фермер-влаклан семинар-совещаний эртаралтын. АККОР-ышто тачылан 87 фермер шога, совещанийыш 38 еҥ миен. Нуным Морко район администрацийым вуйлатыше А.Н.Голубков саламлен. Моркысо ял озанлык управленийым вуйлатыше А.Ю.Гурьянов ты сомылым виктарымаште вуйын шоген. Погынымашке Марий Элысе ялозанлык да продовольствий министрын алмаштышыже Л.Смирнова, Агробизнес кадрым уэш ямдылыше марий институтын ректоржо Ю.Нововсёлов да молат лийыныт. Семинар кок ужаш гыч шоген. Теоретический ужашыште «Льготан кредитований», «Марий Элысе предприниматель-влаклан микрокредит компаний гоч полышым пуышо фонд», «АПК кадр-влакым ямдылыме да квалификацийым нӧлтымӧ шотышто нелылык», «Марий Элысе фермер озанлык-влакын тачысе илышышт да ончыкылыкышт», «Изи озанлык-влаклан полышым пуымаш» теме дене выступатленыт. Кокымшо ужаш практический лийын.
Тӱшка да фермер озанлык-влаклан льготан кок тӱрлӧ кредит ойыралтеш. Тиде тургым пашалан да инвестицийлан. Икымше кредит урлыкаш пырчым, ӱяҥдышым да ГСМ материалым налаш кучылталтеш. Кредитым 15 тылзе гыч петырыман. Кокымшо – инвестиционный – техникым, урлыкаш вольыкым налаш пуалтеш, тудым латвич ийыште тӱлыман. Кредитым налме годым фермер 15-20 процент взносым тӱла. «Россельхозбанк» АО-н Марий Элысе филиалже тений изи да кокла бизнеслан 340 миллион теҥге оксам ойырен.
Семинар-совещанийыш толшо фермер-влакым районысо кум фермер озанлыкым ончаш намиеныт. Морко районышто тачылан грантым налше 14 фермер уло. Ондак Овдасола ялысе С.Рахимовын фермер озанлыкшым ончыктеныт. Тудо еш фермым почаш кодшо ийын грантым сеҥен налын. Семинарын участникше-влаклан вольыкым вӱта гыч лукмо да кеҥежлан кӱтӱш колташ ямдылыме шотышто ойленыт. Ушкал кӱчым станокеш пӱчкеден ончыктеныт. Фермерын 99 ушкалже уло.
Грант окса дене кок озанлык пашажым вораҥдарен толеш. Тиде Тыгыде Морко ялыште Рудольф Каменскийын да Арын Чодыраялыште Василий Ильинын озанлыкышт. Пашам кӱлынак ыштымыштым ужын, таче ялын вийже лач мланде пашам чот йӧратыше еҥ-влакын кидыштышт манын каласаш лиеш. Фермер-влак шке коклаштышт паша опытышт дене палдареныт, икте-весышт деч могай-гынат у сомыллан тунемыныт.