Россий Минстройышто РФ-н Чоҥымо паша да ЖКХ министржын алмаштышыже А.Ересько ден Марий Эл Республик Правительстве председательын икымше алмаштышыже А.Сальников паша вашлиймаш годым «Чистая вода» ден «Оздоровление Волги» федеральный проект-влакым кундемыштына шуктымо шотышто каҥашеныт.
Нине проект-шамыч калыкын илыме условийыштым саемдаш полшат, сандене чыла палемдыме мероприятийым жапыштыже шуктыман. 2019 ийыште кундемыштына «Повышение качества водоснабжения в Республике Марий Эл» региональный программым пеҥгыдемдыме. Тудо 2024 ий марте шуйна. Эн ончычак программе полшымо дене санитарно-химический показатель почеш нормативлан келшен толдымо вӱдан населённый пунктышто пашам шукташ палемдыме.
«Чистая вода» проектын шонымашыже – вӱдпуч системым уэмдыме да у технологийым кучылтмо дене вӱдын качествыжым саемдаш. Кызыт кундемыштына 90,7% еҥ сай вӱдым йӱэш. 2024 ий марте ты показатель 94 процентыш шушаш, а оласе 100 процент еҥ сай вӱд дене пайдаланышаш.
Волжск олаште Мамасево урем гыч Кӱсола ял марте вӱдпуч сетьым шупшыт, тыгак Медведево район Куяр посёлкышто вӱдым тулымо системым уэмдат, Морко посёлкышто рӱдӧ водозаборышто вӱдым пушкыдемдыше станцийым келыштарат. Нине объект-влакым тений идалык мучаш марте ыштен шуктышаш улыт. Вес ийыште Звенигово оласе Сергушкин водозаборышто кок скважиным кӱнчаш да Юрино районысо Юркино посёлкышто вӱдпучым вашталташ палемдыме. Ты посёлкысо вӱдпучым ачалаш республикысе правительстве гыч 3,9 млн теҥгем ойырымо.
«Оздоровление Волги» проект почеш могай паша ышталтме нерген — «Кугарня» газетын 29 апрельысе номерыштыже 3-шо страницыште.
Д.Речкинын фотожо.