Шернур районышто илыше 51 ияш пӧръеҥлан ик мессенджерышкыже палыдыме номер гыч икмыняр файлым колтеныт да «тыйын фотографиет мо?» манын возеныт. Пӧръеҥ файл-влакым «почын», тыге мошенник-шамыч тудын телефонысо приложенийлаж дене пайдаланен сеҥеныт. Аферист пӧръеҥын кредит картыж гыч 200 тӱжем наре теҥгем палыдыме счётлаш колтен.
Йошкар-Олаште илыше 43 ияш ӱдырамаш да Морко районышто илыше 35 ияш ӱдырамаш тыгаяк схеме почеш 44 тӱжем наре теҥгелан ондалалтыныт, палдара Марий Элысе МВД.
Палыдыме номер гыч колтымо файл-влакым ида «поч». Тидым ыштенда гын:
– банкын «шокшо линийышкыже» йыҥгыртен, банк картыдам блокироватлыза;
– телефондам заводской настройко марте форматироватлыза (тыге эҥгекым кондышо программе деч утледа);
– телефоныштыда «полёт» режимым иканаште чӱктыза.