1 февральыште Т.Евсеев лӱмеш тоштерыште Российысе «Евсеев лудмаш» XVII научно-практический конференций эртен.
Тушко элнан 16 регионжо гыч 130 утла тоштер пашаеҥ ушнен. Чылаже 60 утла доклад йоҥген. Тоштер да туризм сферысе вӱдышӧ специалист-влак тоштерысе туризм, кызытсе илышын кӱштымыж почеш мультимедийный технологийым кучылташ кӱлмӧ нерген ойленыт. Тоштер пашам кузе вораҥдараш лийме шотышто шке шонымашышт дене пайлалтыныт да моло йодыш-влакым пырля лончыленыт.
Участник-шамычым Марий Элысе Правительстве Председательын алмаштышыже – тӱвыра, печать да калык-влакын пашашт шотышто министр К.А.Иванов саламлен. Тудо тыгай конференцийын кӱлешлыкшым, тоштер пашам вораҥдараш полшымыжым палемден. Тылеч вара участник да уна-влак «Земля, рождённая небом» выставочный проектын дене палдарымаш презентацийже лийын. Тудым 2023 ийыште «Тӱвыра» нацпроект почеш илышыш шыҥдареныт. Кызытсе илышлан келыштаралтше шкешотан, ончерыште марий калыкын йӱлаже, илышыже, тӱвыраже, ыштыш-кучемже сайынак коеш. Инновационный технологий, нейросеть, сӱретчын картиныже-влак ончерлан шкешотан ямым пуртат. А ожнысо марий-влакын илемышт, вургемышт, арверышт да сӧрастарыше ӱзгарышт калыкна дене эшеат чот кугешнаш кумылаҥда.
Т.Евсеев лӱмеш тоштерын архивше гыч фото.