Марий этнограф Тимофей Евсеевын шочмыжлан 135 ий темме лӱмеш ятыр проект илышыш шыҥдаралтеш. Тидыже тоштер фондым тӱрлӧ арвер да материал дене пойдараш полша.
«Самырык этно-лабораторий» проектын волонтёржо-влак тоштерыш тыгай погым пуэныт:
– Т. Евсеевын рушла возен кодымо преданийже дене 11 тетрадь (Морко районысо Азъял, Кугу Ярамарий, Новая яллаште, Медведево район Поланур ялыште);
– 1934 ий 4 декабрьыште МарОБИК президиум член, Мартран ?лесын вуйлатышыже П.Андреевын пуымо паша(трудовой) книгажын копийже;
– 1933 ийыште Марий автономий область прокурорлан Т. Евсеевын возымо вуйшиймашыже;
– Т. Евсеевын пелашыже Марфа Евсееван вуйчиемжым – шарпаным.
Тылеч посна режиссёр А.Огородников кӱчык фильмым ямдылымыж годым шуко материалым тоштерыш конден: туштым возыман, марий вургем ойыртемым ончыктыман тетрадь-влак. Тылеч посна рукописный материал-шамычым верештыныт.
Чыла тиде пого музейыште улшо коллекцийым утларак пойдара.