Курыкмарий районысо Я.Эшпай лӱмеш калык тӱвыра рӱдерыште вокально-инструментальный ансамбль да рок-группо-влакын «ЭтноСем» регион-влак кокласе молодёжный этнофестивальышт лийын. Тудым Тӱвыра инициативе-влак президент фондын полшымыж дене Марий Элысе Творческий пашаеҥ-влакын ушемышт да Республикысе калык усталык да культурканыш паша шотышто шанче-методике рӱдер эртареныт.
Этнофестивальыш Курыкмарий, Звенигово, Медведево, Морко, Оршанке, Советский районла, Волжск, Йошкар-Ола, Москва да Озаҥ олала гыч 17 коллектив ушнен. Чапланыше авторский, шке возымо, кызытсе аранжировкан калык муро-влак йоҥгеныт.
Участник-влаклан творческий лабораторий пашам ыштен, тыгак нуно Козьмодемьянскысе тӱвыра-историй тоштер комплексыште экскурсий дене лийыныт.
Гран-прим Моско ола гыч «Моё» рок-группо налын. Рок-группо-влак коклаште I степенян лауреат лӱмым Медведевысе рӱдӧ клуб системын «PaZZL» да Йошкар-Ола гыч «Легион 12.rus» рок-группо-влак суленыт, вокально-инструментальный ансамбль-шамыч коклаште – Озаҥ ола гыч «Инеш» группо, этно-группо-влак коклаште – Курыкмарий районысо Я.Эшпай лӱмеш калык тӱвыра рӱдерын «Аяр» калык группыжо.
Республикысе калык усталык да культурканыш паша шотышто шанче-методике рӱдерын фотожо.