Кажне тунемме идалык кыдалне марий кундемысе чыла районысо школышто туныктымо предметла дене олимпиаде эртаралтеш. Тунемше сай лектышым ончыкта гын, туныктышын паша саскажат тӱвыргӧ лиеш. А этнокультур предметла дене олимпиадылан поснак кугу тӱткыш ойыралтеш.
Тачысе кечылан мемнан ончылно моткоч пӱсӧ йодыш шога: шочмо марий йылмын чапшым кӱшнӧ кучымаш. Шоналтетат, ик марий еҥат шке йылмыж деч посна илен огеш керт. Мемнан вӱршернажак кугезынан пӧлеклен кодымо марий шӱлыш дене ила. Тугеже молан йоча школ йолгорным тошкымыж годымак шочмо йылмыже верч пеҥгыдын шогышаш огыл? Тыште этнокультур предметлам туныктышо-влакын гына надырышт лийшаш огыл, ача-ава-влакат вуйын шогышаш улыт.
Морко кундемыштына тидын шотышто паша кӱлынак воранен шога. Ты тунемме идалыкыштат районыштына этнокультур предметла дене эртаралтше олимпиадын лектышыже тӱвыргӧ. Тыште адакат туныктышын тыршымыже да кугу надырже раш коеш. Шочмо йылме, марий литератур, кугыжаныш марий йылме да ИКН предметла дене паша лектышым палемдыманак шонем.
Ты ийын этнокультур предметла дене олимпиаде 7-ше класс гыч тӱҥалын. Шочмо марий йылме дене 7-ше классыште сеҥыше радамыш Максим Степанов (Унчо школ) лектын, 8-ше классыште – Алина Евсюткина (Унчо школ), 9-ше классыште – Инесса Степанова (Кокласола лицей), 10-шо классыште – Ольга Степанова (Унчо школ), 11-ше классыште – Анастасия Казанцева (Унчо школ).
Марий литератур предметым иктешлаш гын, тыгайрак лектыш: 7-ше классыште эн шуко баллым поген Екатерина Николаева (Арын школ), 8-ше классыште – Татьяна Суворова (Кокласола лицей), 9-ше классыште – Дарья Архипова (Эҥерсола школ), 10-шо классыште – Виктория Петрова (Унчо школ), 11-ше классыште – Дмитрий Кириллов (Унчо школ).
Сеҥыше-влак коклаште шукынжо Унчо школын тунемшышт улыт. Тыште Петрова Р.Н. ден Игнатьева Л.К. туныктат, Кокласола лицейыште – Аркадьева Н.В. ден Смирнов В.Е., Эҥерсола школышто – Александрова Э.В., Арын школышто – Семёнова Ю.А.
Кугыжаныш марий йылме дене олипиадыште ойыртемалтыныт: 7-ше классыште – Екатерина Семёнова (Морко 2-шо №-ан школ), 8-ше классыште – Мария Игнатьева (Морко 1-ше №-ан школ) да Вероника Петрова (Морко 2-шо №-ан школ), 9-ше классыште – Антон Алексеев (Морко 1-ше №-ан школ), 10-шо классыште – Никита Алексеев (Морко 2-шо №-ан школ), 11-ше классыште – Анна Алексеева (Морко 1-ше №-ан школ).
Кугыжаныш марий йылмым Морко 1-ше №-ан школышто Никитина С.В., Морко 2-шо №-ан школышто Михайлова М.В. ден Голубкина Н.А. туныктат.
ИКН предмет денат паша лектыш тӱвыргӧ. 7-ше классыште эн шуко баллым Кирилл Ильин (Морко 1-ше №-ан школ), 8-ше классыште – Арина Бочкарёва (Морко 1-ше №-ан школ), 9-ше классыште – Татьяна Назарова (Зеленогорский школ), 10-шо классыште – Анастасия Бабенко (Морко 2-шо №-ан школ), 11-ше классыште – Анастасия Сидорова (Унчо школ).
ИКН предметым Морко 1-ше №-ан школышто Архипова Э.П. туныкта, Морко 2-шо №-ан школышто – Сергеева Л.Ю.) Зеленогорский школышто – Воробьёва М.А., Унчо школышто – Игнатьева Л.К.
Этнокультур предметла дене районышто эртаралтше олимпиадын паша саскаже чоным куандара. Ты турын эн чолга тунемшыже-влак регион кӱкшытыштӧ шке вий-куатыштым тергаш тӱҥалыт. Тек кушкын шогышо самырык тукым шке марий улмыжлан куанен шога. Лач тыге веле марий йылме шке чапшым кӱшнӧ кучаш тӱҥалеш. А марий йылмым туныктышо-влаклан таум каласыме шуэш, вет нунын шуктен шогымо сомылышт нимо деч чот шерге.
Е.В.Григорьева, районысо марий йылме туныктышо-влакын метод ушем вуйлатышышт.