Медведево район Краснооктябрьский посёлко гыч Сергей Горшков дене октябрь мучаште вашлийын кутыренна. Тунам тудо боевой задачым пырля шуктышо йолташыже, Звенигово район Шолэҥер посёлко гыч Иван Яндушев, дене Йошкар-Оласе «Сердце матери» толкынын офисышкыже толын ыле. Боец-влаклан волонтёр-шамыч деч кок тепловизорым, бензопилам кучыктеныт.
Пӧръеҥ-влак марий батальонышто служитлат, Херсон областьыште порысыштым шуктат. Октябрьыште отпускыш толын каеныт.
– Ӱмаште 30 сентябрьыште мобилизоватлалтынам. Тидлан ямде лийынам манын ом керт. Но кӧргӧ чонем дене пуйто шижынам, повестке толмеке, ӧрын омыл, – ойла С.Горшков. – 18 октябрь гыч военный операций кайыме верыште порысем шуктем. Тушко мийымеке, икымше кечынак позиций-влакым ямдылаш, блиндажлан окопым кӱнчаш тӱҥалынна. Ончыч тидым ӧрканенрак ыштенна, кушко логалмынам эше пален шуктен огынал ыле. А тушман снаряд-влак чоҥештен толаш тӱҥалмеке, пашалан кӱлынак пижаш логалын – шке илышым утарен кодыман вет.
Мӧҥгыштӧ пӧръеҥым пелашыже, кок икшывыже вучат, тургыжланат. Елена дене Сергей ик посёлкышто шочын-кушкыныт, 10-шо классыште тунеммышт годымак келшаш тӱҥалыныт. Елена тудым армийыш ужатен, пӧртылмыжым вучен. Кызыт Горшковмытын индеш ияш Максим эргышт да вашке кок ийым темыше Полина ӱдырышт кушкыт.
Максим ачажын кушто улмыжым, молан тушко кайымыжым раш пала да умыла. А Полина кандаш тылзыште (тылеч ончыч С.Горшков февральыште отпускыш толын каен – Авт.) ачажым монден шуктен. Ньогалан «палыдыме айдеме» дек тунем шуаш шагат наре жап кӱлын.
Отпусклан 21 кече (корныге) пуалтын. Тиде жапым Сергей ешыж дене эртарен. Толмыж нерген лач пелашыжлан гына увертарен, молыштлан: икшывыже-влаклан, коча-коважлан, изажлан да йолташыже-шамычлан – тиде сюрприз лийын. Чаманен каласыман, икмыняр ий ончыч Сергейын ачаже колен, садлан пӧръеҥ семын чоным почын кутыраш, кугурак семын каҥашым йодаш тудлан изаже – ӱшанле эҥертыш.
С.Горшковын задачыже – корнышто блокпостышто шогаш, гражданский да военный машина-влакым тергаш. Марий батальонышто служитлыше-влак ваш-ваш эре полшат, кумылаҥдат.
– Тиде ик ий жапыште еш деч тораште лияш эн нелын чучын, молыжлан тунем шуат. Йӧн лийме семын мӧҥгӧ йыҥгырташ тыршем. Палем, мыйын верч ойгырат, вучат. Пелашемлан тауштем, шкетланже кок икшыве дене куштылго огыл. Садлан чот неле годым еш нерген шонымаш кӧргӧ вийым пуа. Эргым мыйым геройлан шотла, тудлан мый сай примерым гына ончыктышаш улам, – манеш пӧръен.
Меат чылан мӧҥгӧ пӧртылмыдам вучена, Марий кундемын патыр эргыже-влак. Тек тиде жап вашкерак лишемеш.
С.Горшковын альбомжо гыч налме фото.