Ешлан полыш уло да лиеш

Марий Эл Вуйлатышын пресс-службыжын фотожо.

14 январьыште Йошкар-Олаште Г.Константинов лӱмеш Руш академический драмтеатрыште Еш идалыкым пайремлын мучашленыт.

Еш идалыкыште Марий Элыште 1000 утла мероприятий лийын. Тушко тӱрлӧ ийготан еҥ, шуко шочшан да икмыняр тукыман еш-влак ушненыт.

Эн кугу мероприятий семын Российыште Еш, йӧратымаш да ӱшанле улмо кечым шотлыман. Тыгодым Марий кундемысе вич ешлан Марий Элым Вуйлатышын почётан палыжым кучыктымо, а 70 мужырлан – «За любовь и верность» медальым.

«Семья Марий Эл» проект почеш ача-ава сообществе-влак дене вашлиймашлам эртарыме. Тудын лектышыже семын 435 инициативым ямдылымаш лийын.

ВДНХ-се «Россий» ончерыште Марий Эл Республикын чапшым Шернур район гыч Шабдаровмыт араленыт. Лачак ты еш Российысе «Идалыкын ешыже» конкурсышто сеҥышыш лектын. Шабдаровмыт Россий Президентын Администрацийжым Вуйлатышын алмаштышыже Сергей Кириенколан мемнан стендыште экскурсийым эртареныт.

Идалыкым иктешлыме годым Ю.Зайцев палемден: «2024 ий эртен, но еш-влаклан полшымо паша умбакыже шуйна».

— Кодшо ийын шуко шочшан-влак шотышто статусым федеральный кӱкшытыштӧ пеҥгыдемдыме. А Марий Элыште «О многодетной семье в Республике Марий Эл и мерах по её социальной поддержке» законым лукмо.

— Вара Марий Элым Вуйлатыше Шуко шочшан еш-влакын кечыштым кажне ийын 28 мартыште кундемыштына палемдаш тӱҥалына манын увертарен.

— 2025 ий гыч республикыштына еш-влаклан у полыш-влакым палемдыме. Теве вузышто очно тунемше студентке-влак азам ыштат гын, нунылан 100 тӱжем теҥгеаш ик гана тӱлымӧ выплате пуалтеш. А шуко шочшан еш ик йочан тунеммыжлан тӱлымӧ оксан 50 процентшым пӧртылтен кертеш.

— Кумшо але тылеч вара шочшо аза улмо годым ешлан ипотекым петыраш 1 млн марте теҥгем ойыраш палемдыме.

— Тылеч посна 2025 ийыште еш-шамычлан шочшо азалан икымше полыш семынак кӱлшӧ арвер-влакын прокатыштым почыт.

— Кум ияш марте ньогам кӱчык жапыште ончымо шотышто социальный няне-влак пашам ышташ тӱҥалыт.

— Тыгак тений гыч ача-ава-влаклан, икымше аза шочмеке, пӧлекым кучыктат.

— Еш клуб-влак, «Движение Первых» первичный отделенийлаште школысо паша отряд-шамыч да «Тимуровцы наших дней» добровольческий отряд-шамыч почылтыт.

Тений Россий Президентын кӱштымыж почеш элыштына «Семья» нацпроект илышыш шыҥдаралташ тӱҥалеш. Тушко вич федеральный проект пура. Нуно Российысе еш-влакын илыме йӧныштым саемдаш, демографийлан полшаш, еш поянлыкым шукемдаш да еш институтым тӱрыснек пеҥгыдемдаш виктаралтыныт.

Эльвира Терентьева.