Россий Президент В.Путинын Указше почеш тений ме Ешын идалыкшым палемдена. Еш – илышын рӱдыжӧ, куанже. Тудо кажнылан ик эн лишыл да йӧратыме. Лишыл еҥ-влак дене пырля ме пиалан, кумыл нӧлтшӧ улына. А те еш дене пырля мом ышташ йӧратеда? Жапым кузе эртареда?
Валентина Чернова, клуб пашаеҥ:
– Шошым пеш шуко паша. Кызыт ме, пырля погынен, кудывечыште лумым кышкена. Мланде кошкаш тӱҥалмек, кудывечым эрыктена, пакчаште йыраҥым кӱнчена.
Каныш годым кухньышто шогылташ йӧратена. Кӧ пиццым, кӧ роллым ышта. Южгунам шукын погынена: 13-н лийына. Тунам мелнам, перемечым кӱэштына.