Россий Президент В.Путинын Указше почеш тений ме Ешын идалыкшым палемдена. Еш – илышын рӱдыжӧ, куанже. Тудо кажнылан ик эн лишыл да йӧратыме. Лишыл еҥ-влак дене пырля ме пиалан, кумыл нӧлтшӧ улына. А те еш дене пырля мом ышташ йӧратеда? Жапым кузе эртареда?
Валентина Рожкова, туныктышо:
– Ме олаште илена, сандене мотор кече годым ешге уремыш лектын кошташ йӧратена. Пӱртӱсыштӧ мыланна лияш келша. Родо-влаклан полышкалена, пакча пашам вораҥдарена. Иктаж кочкышым пырля ыштена. Мутлан, подкогыльым, пловым ямдылена, салмаште пареҥгым кӱктена.