Россий Президент В.Путинын Указше почеш тений ме Ешын идалыкшым палемдена. Еш – илышын рӱдыжӧ, куанже. Тудо кажнылан ик эн лишыл да йӧратыме. Лишыл еҥ-влак дене пырля ме пиалан, кумыл нӧлтшӧ улына. А те еш дене пырля мом ышташ йӧратеда? Жапым кузе эртареда?
Наталья Соловьёва, бухгалтер:
– Шочмо ялыштем, Шернур район Эҥерсолаште, ешге пашам ыштена: кудывечым эрыктена, йыраҥым кӱнчена, пайрем ӱстелым погена. Теве вашке Кугече пайрем толын шуэш. Тунам когыльым пырля тӱрлена.
Концерт ден спектакльлашке, тӱрлӧ тӱвыра мероприятийышке кошташ йӧратена. Тений 30 мартыште Йошкар-Олашке Сеҥымашын XXX идалыкше лӱмеш тӱвыра полатышке авам да тукым шӱжарем дене пырля Липецк ола гыч толшо «Казаки России» куштышо театрым ончаш миен коштна, февральыште – Шкетан лӱмеш Марий драмтеатрышке Карачаево-Черкесий гыч толшо «Пара» дуэтын концертшым.
Сай, кунам ешыште йоча-влак улыт. Ача-аванан кок ӱдыржӧ улына: мый эн изиракше. Акам ынде шкежат ешан-шочшан лийын. Туге гынат тачат ик еш гаяк улына. Телым курыкышто мунчалтена, ече дене коштына, кеҥежым эҥерыште йӱштылына, тыгак емыж-саскам погена.