Эше ныл геройын лӱмжӧ пале

Марий Эл гыч поисковик-влак 23 апрель гыч 7 май марте Ленинград область Кировский районыш экспедиций дене миен коштыныт.

Марий Эл Республикын группыж дене МарГУ-н «Воскресение» кычалше отрядше гыч 11 еҥ да Волжск оласе «Защитник» отряд гыч ик боец миеныт. Ленинград областьыште экспедиций дене землякна-влак индешымше гана лийыныт.

Элнан йӱдвел-касвел ужашыштыже Марий кундем гыч тӱжем дене совет салтак кредалын. Кугу Отечественный сар годым Йошкар Армий тушто моткоч шуко салтакым йомдарен.

Кычалме паша 8-ше армийын 59-ше ече батальонжын кредалме верлаштыже шукталтын. Санкт-Петербург гыч «Уголёк» отрядын поисковикше-влак дене пырля 20 салтакын лулегыжым да красноармеец-влакын 10 медальоныштым муыныт. Нунын кокла гыч 4 медальонышто гына возымым лудаш лийын. Эше кок запискам экспертизыш пуымо.

Ик колышыжын, А.С.Селиверстинын, ешыж ден кылым ыштыме, родо-тукымжо шке геройжын фотожым колтен. Эше кум салтакын родыштым кычалыт. Экспедиций гыч утларак информацийым «Воскресение» студент-влак кычалше отрядын ВКонтакте тӱшкаштыже (https://vk.com/spovoskresenie) муаш лиеш.

Сеҥымаш кечын Йошкар-Олаште Ленин лӱмеш площадьыште отрядын боецше-влак Йошкар Армий салтакын снаряженийжым, чийыме формыжын образецшым, экпедицийыште мумо моло арверым ончерыш чумыреныт.

Фотом отрядын ВКонтакте тӱшкасе альбомжо гыч налме.