Медведево посёлкысо ик уремысе 9-ше номеран пӧртын ик пӧлемысе пырдыжыштыже салтакын формыжо кеча. Пӱкен вуйышто тыглай чиен коштмо вургем, воктенысе ӱстембалне кидшагат, фотоальбом да моло арвер-влак аралалтыт. Нуно 2023 ий 13 июльышто СВО-што вуйым пыштыше салтак Алексей Ямбухтинын улыт.
Ава эргыж нерген шарныктыш-шамычымарален, йӧсым кеч изиш лыпландарем, манеш. Таисия Сергеевна деке мийымеке, тудо мыйым вигак эргыжын пӧлемыш эрташ ӱжӧ. Тушто тудын дене эргыж нерген мутланышна.
Ушан да тыматле койышан
Алексей йочасадыш коштын огыл. Ача-ава пашаште лийме годым тудо кум ийлан кугурак акаже дене кова-кочашт пелен шинченыт. Алексейын кочаже Иосиф Фёдорович – Кугу Ачамланде сарын ветеранже. Пелашыж дене икшыве-шамычым лудаш, возаш, тӱням йӧраташ туныктеныт.
1997 ийыште рвезе Медведево посёлкысо 1-ше номеран школыш икымше классыш каен. Школышто сайын тунемын. Тидлан эреак тӱрлӧ грамот дене палемдалтын. Районысо, республикысе олимпиадылаште уш-акылжым чӱчкыдын терген. Шукыж годым сеҥыше-влак радамыште лийын. Рвезылан информатике, географий, физике, руш йылме предмет-влак утларак келшеныт.
– Туныктышо-шамыч эргымым отличникым ужыныт. А тудын ик але кок нылытан отметке чырыкыште эре лектын. Икана школышкат тидлан мыйым ӱжыктеныт ыле. Алёшан отличник лиймыже шуын огыл улмаш, тудо вожылшо рвезе кушкын.
Школ деч вара МарГУ-ш тунемаш пурен, но тудым ала-могай амаллан кӧра кудалтен. Варажым армийыш каен. Стрелок лийын. Туштат боевой подготовкын тӱҥ предметлажым эреак «отлично» оценкылан сдатлен. Эл ончылно порысшым шуктымо деч вара Политехыш «Налог и налогообложение» факультетыш тунемаш пурен. Кок ийым тунеммеке, тудымат кудалтен. Мыланем тидын нерген нимом ойлен огыл, – чонжым почо Таисия Сергеевна.
Алексей кушмекыжат тыматле, поро, шыргыжше лийын. Школым пытарымыж годым ачаже илыш гыч каен. Аван кок икшывыже – тӱҥ эҥертышыже – кодын. Алексей чыла пашаланат кумылзак лийын: пӧртымат мушкын, пакчаштат тыршен, моло сомылланат вуйым шупшын огыл. Чаманен каласыман, герой, ешым чумырен шуктыде, икшывым шочыктыде, ты тӱня гыч каен. Тидланже Таисия Сергеевна эшеат чот ойгыра. Кызыт аван кумылжым Алексейын кресэргыже нӧлта. Тудо Таисия Сергеевналан чӱчкыдын йыҥгырта, уналыкеш толын кая.
Икымше толкын дене
Россий Президентын 2022 ий 21 сентябрьыште мобилизаций нерген увертарыме Указше почеш Алексей Ямбухтинлан повестке толын. Рвезым мобилизацийын икымше толкынжо почеш СВО-ш колтеныт. Тудо гаубичный батарей расчётын номерже почеш тушман ваштареш шоген. Порысым шуктымо годым чын да лӱддымӧ салтак улмыжлан икмыняр гана тӱрлӧ награде дене палемдалтын. Тудым «За освобождение Луганской и Донецкой Народных Республик», II степенян «За воинскую доблесть» медаль-влак дене наградитленыт.
– Кайымыж деч вара ик жап Ульяновскышто ученийыште лийын, но У ийым Донецк Республикыште вашлийын. Кертмыж семын йыҥгырташ тыршен. Заданий дене ончыко каеныт гын, тынар жап йыҥгыртен ом керт, ида йомдаре манын лыпландарен. Икымше гана сусыргымыж нергенат ойлен огыл. Вуйыштыжо удар деч кугу гематомо лийын улмаш, Донецкыште госпитальыште эмлалтын. 2023 ий 12 июльышто эргым 33 ийым темен, мый тудым шочмо кечыж дене саламленам, иктым-весым кутыренна. Эрлашыжым Алексей уке лийын, – палдарыш ава.
Дрон пытарен
Алексей Ямбухтин Первомайское села верч шогымо годым колен. Тушманын дронжо салтак-шамычын шогымо верыштым атаковатлен. Тушто икмынярын лийыныт, но дрон Алексейын илышыжым налын. Ты кредалмаште лӱддымылыкым да патырлыкым ончыктымыжлан Алексей Ямбухтиным (колымекыже) Патырлык орден дене палемденыт.
– Алёшан уке лиймыж нерген йолташыже-шамыч акажлан йыҥгыртен каласеныт. Тудын тушто пырля лийше ныл йолташыже эргымым пытартыш корныш ужаташ толыныт. Каласкалымышт почеш, дрон деч вара нуным артиллерий чот почкен. Эргымын колышо капшым йӱдым нушкын миен веле луктыныт. Тудын кидыштыже шагат аралалт кодын. Тачат ты шагат коштеш, кайымыж деч ик ий эртымеке веле тудым сайын эрыктенам да пӧлемышкыже вераҥденам, – каласкалыш Таисия Сергеевна.
Алексей лӱмеш
Медведево посёлкысо Киров уремын ик ужашыжлан Алексей Ямбухтинын лӱмжым пуынешт. Тидлан верысе чолга еҥ да пошкудо-шамыч вуйын шогат. Нунын шонымышт почеш, герой-влак нерген палышаш улыт. Но Таисия Сергеевна тидлан тореш улам манеш. Моланжым тыге умалтарыш:
– Алексей вет шып, вожылшо лийын, еҥ коклаште шкенжым ончыкташ тыршен огыл. Эргым тудын нерген ойлымымат йӧратен огыл. Садланак школышто тунеммыж годымат отличник лияш тореш лийын. Теве колымекыже орденым пуэныт. Мыйын шонымаште, айдемылан илыме годым тыгай наградым пуыман.
Кызыт Ямбухтинмытын илыме пӧрт пырдыжыштышт Кугу Ачамланде сарын ветеранже Иосиф Фёдорович Ямбухтин лӱмеш табличке кеча. Вашке тушко СВО-што ӱмыр лугыч лийше, мемнан тыныслыкна верч илышым пуышо салтак Алексей Геннадьевич Ямбухтин лӱмеш шарныктышым пижыктышаш улыт. Ты сурт ончычсо да кызытсе герой-влак нерген тысе калыклан шарныкташ тӱҥалеш. А уремлан салтакын лӱмжым пуаш – моткоч сай шонымаш. Ме герой-влакым палышаш да шарнышаш улына!
Авторын да еш альбом гыч налме фото-влак.