Октябрь мучаште Российын Геройжо Леонид Рыжов шочмо кундемышкыже толын каен.
Тунам Герой Козьмодемьянскысе А.В.Григорьев лӱмеш художественно-исторический тоштерышке миен, специальный военный операцийысе участник-шамычлан пӧлеклалтше ончерым, экспозиций-влакым ончен лектын.
Тоштерыште нине экспозиций-влакым уэмдыме, увер-влакым ешарыме паша эреак шукталтеш. Ты ончерым чумыраш Козьмодемьянск гыч СВО-што лийше ден волонтёр-влак полшенак шогат. Тидлан да СВО кайыме верлашке гуманитар полышым колтымыштлан Леонид Рыжов кугу таум каласен коден.
Козьмодемьянскыште ола ден Курыкмарий районын администраций полатышт ончылно Российын Геройжо улмым палдарыше стендым ужмеке, земляк-полковникна верч кугешнымашым шижым.
Леонид Владимирович Рыжов 1977 ий 9 августышто Козьмодемьянск олаште шочын. Йоча шонымашыжым шукташ манын, оласе 2-шо номеран школ деч вара Озаҥысе кӱшыл танковый командный училищыш каен. Тушто РФ-sн ончыкылык Геройжо А.В.Козин дене пырля ик взводышто тунемын.
Училище деч вара 1999 ий мартыште Л.В.Рыжовым Сибирский военный округыш колтат. Тушто Чита областьысе Сретенск олаште танковый взводын командиржылан, Песчанка посёлкышто учебный танковый взводын командиржылан служитла. А 1999 ий октябрьыште рото командирын алмаштышыже лиеш, варажым – СибВО-н штабшын охране да обеспечений отдельный батальонын почётный караулжын рото командирже.
Л.В.Рыжов Бурятийыште ик батальонын штабшым, Иркутск областьыште техникым да вооруженийым аралыме тӱшкам вуйлата. 2009-2012 ийлаште Читаште учебный отделын начальникше – 328-ше сержант-влак школ вуйлатышын алмаштышыже должностьышто службым шукта.
2012 ийыште Леонид Владимирович РФ Вооружённый вийын общевойсковой академийышкыже (Моско) тунемаш пура. Тудым пытарымеке, специалист-влакым ямдылыме Лисичанский Краснознамённый рӱдерыште служитла (Свердловcr область). 2013 ийыште рӱдер вуйлатышын алмаштышыжлан тыршаш тӱҥалеш, 2014 ийыште – рӱдерысе штабын вуйлатышыжлан.
Тылеч вара землякна Таджикистаныште, Челябинск да Свердловск областьыште службым эрта. А 2018 ийыште Сирийысе военный операцийын участникше лиеш.
2019 ийыште Л.В.Рыжовым Ростов областьысе Новочеркасск олаш, Южный военный округысо 8-ше гвардейский общевойсковой армийыш, колтат. Тушто ты армийын полк командиржылан – отдел началmникшылан шогалтат, а 2020 ийыште – бригадын командирже – управлений начальникшылан.
2022 ий 24 февраль годсек – специальный военный операцийыште. Тушто ЛНР-ын Народный милиций;ын 2-шо армейский корпусышкыжо пуртымо 7-ше отдельный гвардейский мотострелковый Чистяковский бригадын командиржылан служитла. Тиде бригадын личный составше 2022 ий июльышто ЛНР-ым утарымаште да Северский Донец эҥер гоч вончымаште, ВСУ ваштареш шогымаште героизмым, лӱддымылыкым, пеҥгыдылыкым ончыктен.
Тидым шотыш налын, РФ Президентын 2022 ий 28 июльысо «петырыме» Указше дене гвардий полковник Леонид Владимирович Рыжовлан «Россий Федерацийын Геройжо» лӱмым да «Шӧртньӧ Шӱдыр» медальым пуаш палемдыме.
Медальым Геройлан РФ-ын обороно министрже С.К.Шойгу Москошто Обороным виктарыше национальный рӱдерыште 10 августышто (45 ийым темыме эрлашыжым) кучыктен. Пайремле церемонийыште землякна салтак-влакын подвигыштлан да обязанностьым сайын шуктымыштлан кӧра цельыш шуын кертынна манын да ешарен:
– Мый шке коллективем верч кугешнем! Тиде мыйын личный наградем огыл, а тӱрыс коллективын, ик семын шонышо еҥ-влакын, кӧмыт шке пашаштым ыштеныт да ыштат.
Тыгак Л.В.Рыжов 2022 ий 18 июльысо пунчал почеш – Луганскысе Калык Республикын Геройжо. Полковникын оҥыштыжо II степенян «За заслуги перед Отечеством» орденын медальже (2019) ден Жуковын медальже (2020) чолгыжыт. Тудын нерген пырля служитлыше ден подчинённыйжо-влак пеҥгыде да чыным йӧратыше койышыж нерген ойлат.
Герой шочмо кундемышкыже идалык ончыч толын коштмыж годым ола адинистрацийыште, тыгак «Паллада» парус клубын участникше ден кадет-влак дене вашлийын. Леонид Владимирович, ме тый денет кугешнена!
Эльвира Терентьева.
Авторын да сайт гыч налме фото-влак.