26 мартыште Марий Эл Республикысе Кугыжаныш Погынын шымше созывшын 44-ше сессийже эртаралтын.
Тушто депутат-влак кум йодышым ончен лектыныт, кум законышко вашталтышым пуртеныт, куд пунчалым пеҥгыдемденыт.
Шуко шочшан еш-влаклан полшымо да начар тазалыкан йочам ончымо дене кылдалтше вашталтыш-влак нерген республикысе паша да социальный аралымаш министр М.Островская каласкалыш.
Марий Эл Правительстве Россий Президентын «О мерах социальной поддержки многодетных семей» указше почеш «О многодетной семье в Республике Марий Эл и мерах по ее социальной поддержки» законопроектым ямдылен. Тидлан депутат-шамыч ик ой дене йӱкленыт.
Ынде тиде закон почеш Марий Элыште илыше кум шочшан еш шуко шочшан еш статусым эрелан налеш. Марий Элысе Паша да социальный вияҥмаш министерствын данныйже почеш, республикыштына 3000 наре тыгай еш уло. Кажне шуко шочшан ешлан удостоверенийым кучыктат. Тылеч вара нуно законышто палемдыме тӱрлӧ у льгото дене пайдаланен кертыт. Тушто тунеммылан, эмлалтмылан, социальный полышлан, тыгак тӱвыра, транспорт, ЖКХ, физкультур, спорт сферылаште полыш лийме нерген ойлалтеш. Тыгак ача-ава-влаклан юристын консультацийжым оксам тӱлыде пуаш, амалкалче сомылым шукташ шонышылан полшаш палемдыме.
Тыштак шуко шочшан ешлаште аза шочмо годым регионысо ава капиталын ик гана тӱлымӧ выплатыжым пуымо шотышто радамым возымо. Ты выплате деч посна моло социальный полыш чӱдын илыме-укем ончыде пуалтеш.
Каласыман: шуко шочшан ешлаште приёмный але ончаш налме икшыве-влак улыт гын, моло законодательный акт почеш полышым налыт гын, соцполыш кажне законжо дене келшышынак пуалтеш. А нине полыш икгай улмо годым нунылан социальный гарантийым пуышо кугырак кугытшым ончат.
Варажым депутат-шамыч кум законодательный актыш вашталтышым пуртеныт. Шуко шочшан ешын статусшо нерген у закон лекмеке, посна категорий еҥ-влаклан соцполышым пуымо шотышто икгай положений-влак вийым йомдарат.
Кок але утларак инвалид йочам ончышо, пашам ыштен кертше авалан але ачалан (иктыжлан) кажне тылзын тӱлымӧ кугытым 500 теҥге гыч 5000 теҥге марте кугемдыме.
Тыгак «О ведомственном контроле за соблюдением трудового законодательства и иных нормативных правовых актов, содержащих нормы трудового права» законым тергыше орган семын республикысе Паша да социальный аралымаш министерствым пеҥгыдемдыме.
А варажым тыштак Депутат кече эртаралтын. Тудо законым шуктымо да правопорядкым эскерыме шотышто йодышлан пӧлеклалтын.