
Мурызо-шамыч калыкым тӱрлӧ лектышышт дене эреак куандараш тыршат: у мурым возат, проектым ямдылат. Тыгодым еш, шуктымо паша да моло сомыл нергенат огыт мондо. Кузерак таче нуно илат? Лишыл жапыште у муро-влак дене куандарат мо?
Ксения Юркина:
– Кугу ешем дене Звенигово район Чакмарий селаште илена. Пелашем дене ныл икшывым ончен куштена. Кугурак ӱдырна кокымшо классыште тунемеш, эргына тений икымше классыш каяш ямдылалтеш. Идалык ончыч йыгыр ӱдыр ден эргына шочыныт. Садлан ойгырен шинчылташ жапна йӧршеш уке. Кызыт йоча дене декрет отпускышто улам. Туге гынат, кундемыштына тӱвыра паша вораҥже манын, кертмем семын полшаш тыршем. Паша верем – Чакмарий тӱвыра пӧрт, тыгак Эсмекпляк тӱвыра пӧртыштӧ полышкалем.
Лишыл жапыште икмыняр мурым лукташ ямдылем. Кок мурым соло, иктым дуэт дене мураш тӱҥалам. Тудым Диана Ямбаршева да Александр Мамаев дене возенна.