
Мурызо-шамыч калыкым тӱрлӧ лектышышт дене эреак куандараш тыршат: у мурым возат, проектым ямдылат. Тыгодым еш, шуктымо паша да моло сомыл нергенат огыт мондо. Кузерак таче нуно илат? Лишыл жапыште у муро-влак дене куандарат мо?
Кристина Лебедева:
– Чаманен каласыман, эртыше идалыкыште ончышо-шамычым у муро-влак дене куандарен кертын омыл. Тидлан тӱрлӧ амал лийын. Пашаште шкешотан да ойыртемалтше роль-влакым модынам. Мутлан, «Микулан – презе, Якулан – ӱдыр» спектакльыште тӱҥ героиньым, Катям, модаш ӱшаненыт.
Ешыштемат куандарыше ятыр тат лийын. Йыгыр ӱдырем-шамыч идалык мучашыште республикысе «Онар» йоча ансамбльын ешышкыже ушненыт. Кугу сценыште икымше гана выступатленыт. Тидланже моткоч йывыртеныт. Тыгак гимнастике дене шуаралтыт. Спортын ты видше дене икымше кугу таҥасымашыште вийыштым тергеныт. Ӱдырем-влак дене моткоч кугешнем!
Тенийлан репертуарем у мурсаска-влак дене пойдараш шонем, тидлан кугу планым чоҥенам. Шонымашем-шамычым шукташ, ямде улам. Чонемлан утларакшым лыжга муро, сем келшат. Садлан шукыж годым тыгай сынан произведений-влакым шочыктем. Пытартыш жапыште уста семмастар Светлан Яндукова дене кылна пеҥгыдемын. Тудын дене «Авай», «У ий пиал» муро-влакым возенна.