29 январьыште Э.Сапаев лӱмеш опер да балет академический театрыште Марий Эл Республикыште Ешын идалыкшым пайремлын почмо.
Тышке шуко шочшан еш ден конкурслаште сеҥыше-влакым, тӱрлӧ профессиян династий ден кужу жап пырля илыше мужыр-шамычым, СВО участник-влакын ешыштым ӱжмӧ.
Марий Элым Вуйлатыше Ю.Зайцев республикысе 11 ешлан еш поянлыкым аралымылан да чолга илыш позицийым ончыктымылан наградым кучыктен. А «Родные – Любимые» еш форумышто сеҥыше Шабдаровмыт Российысе еш возакын лампадыжым Йошкар-Оласе загслан кучыктеныт. Тудым Муромысо Свято-Троицкий монастырь гыч кондымо (тушто еш да мужыраҥмашын покровительже-влак шнуй Пётр ден Феврониян мощышт аралалтыт).