Еш команде-влакым «Мыйын еш архивем – 2025» конкурсыш ушнаш ӱжыт. Тудо Кугу Ачамланде сарыште сеҥымылан 80 ий теммылан пӧлеклалтын. Командыште 8-17 ияш икшыве да кугыеҥ-шамыч (коча, кова, чӱчӱ, кока, тукым шӱжар ден иза) лийын кертыт. Ты конкурс икмыняр тукымын илышыжым радамлаш, ешын историйже дене палдараш, нунын подвигышт нерген каласкалаш йӧным ышта.
Конкурсышто «Еш тоштер», «Ешын шарнымаш книгаже», «Фотошарныктыш» номинаций-влак лийыт. Икымше номинацийыште еш нерген чумырымо документ, фотографий, шарнымаш арвер нерген палдарыме экскурсийым эртарыман. Тыгак фронтысо келшымаш але военный йоча пагыт нерген оҥай историйым каласкалыман. Кокымшо номинацийлан Кугу Ачамланде сарыште кредалше родо-влак нерген книгам ыштыман. Тудын дене палдарыман да ик родо-тукым историйым каласкалыман. «Фотошарныктыш» номинацийлан, еш архивысе фото-шамычлан эҥертен, фотокартиным келыштарыман. Тудын кузе шочмыжо да тусо элемент-влак нерген радамлыман.
Конкурсым икмыняр йыжыҥ дене эртараш палемдыме. Эн ончыч тунемме тӧнежлаште отборочный этап лиеш. Вара муниципал округлаште ойыртемалтше-влакым палемдат. Тудо 12 апрель марте шуйна. Сеҥыше-шамыч конкурсын финалышкыже логалыт. Тидлан район але ола округ-влак 14 апрель марте sdpoerviy@mail.ru электрон почтыш йодмашым колтышаш улыт, «Мой семейный архив» манын палемдыман.
Конкурсын финалже 26 апрельыште Йошкар-Олаште лиеш.