7 майыште Провой кундемыште Эсмекпляк гыч Олыктӱр марте «Курымашлык полк» эртен. Вара Олыктӱр ялыште Родион Артемьевич Охотин лӱмеш шогалтыме обелиск воктен вашлиймаш, пайрем концерт лийын. Родион Артемьевич – ты ялын шочшыжо, полковник, И.В.Сталин лӱмеш партизан бригадын командирже лийын.
Исменца школышто тунемше-влак обелиск воктеке кож укш пидышым да пеледыш аршашым пыштеныт. Школ директор Виталий Леонидович Созонов ден пашан ветеранже Владимир Михайлович Портов митингыш толшо-влакым Сеҥымаш кече дене саламленыт, сар корным эртыше-влак нерген каласкаленыт. Полковник Р.А.Охотинын веҥыже шке оньокугызажын илыш корныжым каласкален.
Тиде вашиймашым Марий тӱвыра рӱдер вуйлатышын алмаштышыже, «Мари Ушем» организацийын лидерже Василий Петров эртарен. Тудо пашан ветеранже В.М.Портовлан пӧлекым кучыктен. Самырык тукым деч сар талешке-влакын подвигыштым, лӱмыштым шарнаш йодын.
Олык Ипай лӱмеш премийын лауреатше, мурызо да композитор Светлана Яндукова ден Республикысе марий тӱвыра рӱдерысе «У муро» вокальный студийын вуйлатышыже Геннадий Григорьев сар жапысе да шке возымо муро-влакым муреныт. «Сеҥымаш кече», «Мишка одессит», «Турня-влак» муро-влакым чыланат рӱж муреныт.
Концерт деч вара Юл сер воктек «салтак пучымышым» кочкаш ӱжыныт.
Ты вашлиймашын эше ик ойыртемжылан кӧгӧрченым кавашке колтымым шотлыман. Исменца ялыште илыше Петровмыт еш ты миниглан лӱмынак сар жапысе формым чиен толын, шке машинаштымат келыштарен.