Параньга район Кугу Пумарий ялыште илыше Шабдаровмыт кум шочшыштлан марий лӱмым пуэныт. Шым ияш Эрвина тений 1-ше классыш тунемаш кая, вич ияш Эрай ден кум ияш Талви йочасадыш коштыт.
Ачашт Роман Валерьевич – Кугу Пумарий школышто воспитатлыме паша шотышто директорын алмаштышыже, тыгак географийым да физкультурым туныкта. Юлия пелашыже мӧҥгыштӧ шогылтеш, у тунемме идалыкыште школышто пашам ышташ тӱҥалеш.
Юлия ден Роман Шабдаровмыт марий йӱлам, тӱвырам аклыше улыт, йоча-влакым марий шӱлышеш куштат, шочмо йылмым йӧраташ да пагалаш туныктат. Мо куандара: ешыште чыланат марла кутырат.
– Мый шкеже марий шӱлышан улам, сандене йоча-влакланат марий лӱмымак пуаш шоненам. Эрвина лӱмым пелашем пуэн. А мый кок эргым Эрай ден Талви маньым.
Эрвина – чолга, писе ӱдыр. Сӱретлаш, марла кушташ шӱман, тыгак математикым йӧрата. Эрай – кече гаяк ояр йоча. Уремыште куржталышт модаш, мечым чумаш йӧрата. Кугыеҥ-влак дене кылым вашке муэш.
Поро йолташем пагален, кумшо шочшемлан Талви лӱмым пуышым. Эрай дене таҥастарымаште ласка да шып икшыве, – мане Р.Шабдаров.
Роман Валерьевич ешыште веле огыл, тыгак школыштат йоча-влакым марий шӱлышеш кушта, марла кутыраш кумылаҥда. Тӱрлӧ марий мероприятийым эртараш тырша. Чолга ӱдыр-рвезе-влакым Кугу Пумарий школышко ӱжеш. Тунам нуно шке пашашт нерген тунемше-влаклан каласкалат.
Ӱмаште Роман Валерьевич кок тунемшым Марий самырык тукым слётыш колтен. Теният икмыняр йочам тушко ямдыла.
Марий шӱлыш чыла ешыште озалана, йоча-влакым шочмо йӱлам, тӱвырам аклаш туныктат, икте-весе дене марла кутырат гын, тунам йылмына аралалтеш ыле. Шабдаровмыт ончыкылык тукымлан сай примерым ончыктат.