Волжский район Карай ялысе «Эрвий» йоча ансамбль марий калыкнан историйыштыже кугу кышам коден. Тунам кундемыштына уста йоча-влакым иктеш чумырымо тыгай коллектив шагал лийын. Пеледалтме, тӱзланен толмо пагытыште Марий кундемнам чот чапландарен толын.
Жап эртыме семын тудо шаланен. Тушко коштшо уста куштызо-влак тачат коллектив, виян туныктышышт-влак нерген порын шарнен илат. Сандене 30 апрельыште Карай ялысе тӱвыра пӧртыштӧ «Эрвий» йоча ансамбльым негызлымылан 50 ий темме лӱмеш концертым ончыктат да ялысе калык дене вашлийын мутланат.
Палыме лийын
Ансамбльым чумырымаште Карай ялыште шочын-кушшо, И.С.Палантай лӱмеш музыкальный училищын дирижёрский курсшым тунем пытарыше Егор Кузьмич Савельевын надырже кугу. 1967 ийыште тудо кандашияш Карай школысо хорым вуйлатен. 1972 ийыште хор пелен рвезе-влаклан «Рвезылык» куштымо ансамбльым почмо. Илен-толын, ансамбль «Эрвий» лӱмым налын, тушко ӱдыр-влакат кошташ тӱҥалыныт.
Коллективыште уста профессионал-влак: ансамбльын художественный вуйлатышыже, хормейстер Е.К.Савельев, концертмейстер Н.И.Степанов, балетмейстер Л.В.Андреева – тыршеныт. Йоча-влакым изинекак сценылан шӱмаҥденыт, кушташ туныктеныт. Тыге кугу конкурслашке, фестивальлашке лекташ корно почылтын. Ик сеҥымаш почеш весе коллективлан чапым конденыт. Жюрин акше, йоча-влакын сайын куштен моштымышт коллективым вуйлатыше-влакын паша лектышыштым пеҥгыдемденыт.
1972 ийыште коллектив СССР-лан 50 ий темме лӱмеш Республикысе смотрышто 1-ше степенян диплом дене палемдалтын. 1975 ийыште ВЛКСМ Марий обком ансамбльын участникше-влаклан «Артек» Всесоюзный пионер лагерьышке каяш путёвкым пуэн. Вес ийынже коллективын куштымашыжым Озаҥысе телевидений дене ончыктеныт. Ансамбль Горький олаште эртыше зональный смотрышко каяш путёвкым налын. «Орлёнок» лагерьын юбилей пайремышкыже миен коштын. 1977 ийыште «Эрвий» йоча коллектив «калык ансамбль» лӱмым сулен. Ӱдыр-рвезе-влак Марий Эл, Татарстан, Киров, Пошкырт кундемлаште лийыныт.
Изинекак ансамбльыште
Концертмейстер Николай Степановын кум икшывыжат ансамбльышке коштын. Эн пытартыш Альбина ӱдырышт тушко вич ияшак логалын. Альбина Николаевна Озаҥысе мединститутым педиатрлан тунем лектын, ешыж дене Озаҥыште ила, «Ипсен» фармацевтический компанийыште регионысо менеджерлан тырша. Тудо тыге ойла:
– Егор Кузьмич ден ачам пеш кугу йолташ лийыныт. Тудо мемнан деке чӱчкыдын унала толеш ыле. Ик телым мыйым ужын, «кушталтен ончо-ян» пелештыш. А мыйже кузе моштышым, туге кушталтышым. Тудлан келшыш. «Эрла куд шагат кастене клубышко репетицийышке тол», – мане. Тыге мый вич-куд ияшак коллективын ешышкыже логальым. Ансамбльышке кок изам коштын. Иктыжлан 15 ий, весыжлан 10 ий ыле. Изирак изам дене коктын тошто марий куштымашым ончыктенна.
Умбакыже 29 апрельыште лекше у номерыште лудса.