Прокуратур умылтара
16 ияш эргымым полиций отделенийышке свидетель семын показанийым пуаш ӱжыктат. Йодыштмаш кузе эртышаш? Тыгодым ача-авалан тушто йоча пелен лийман мо?
Т.Тимофеев.
Морко район.
Марий Элысе прокуратур умылтара:
– Ийготыш шудымо икшыве-влакым РФ УПК-н 191-ше статьяжын йодмашыж почеш йодыштмашым эртарат.
Икшыве 16 ийым темен огыл але тынар ийыш шуын, но психике могырым тазалыкше начар гын, тудын дене пырля педагог але психолог лийшаш улыт. Йочалан 16 ий темын гын, педагог ден психологым ӱжаш але укем следователь шке решатла.
Шым ияш марте йоча-влакым перерыв деч посна 30 минут деч шуко йодышташ огеш лий, перерыв дене – ик шагат деч утла. 7-14 ияш йоча-влакым перерыв деч посна ик шагат деч утла йодышташ чарыме. Перерыв дене кок шагат наре йодышташ лиеш. 14 ияш деч кугурак подростко-влакым перерыв деч посна кок шагат деч утла йодыштман огыл, перерыв дене – ныл шагат деч утла. Тыгодым перерывым тыгак шотыш налман. Ача-аван йодыштмашыште лияш правашт уло.
16 ияш марте йочалан показанийым пуаш тореш лиймылан, чыным огыл ойлымылан мутым кучаш шогалтыме нерген огыт шижтаре. РФ УПК-н 42-шо ден 56-шо статьяже-влак почеш, нунылан чыным ойлаш кӱлмӧ нерген веле каласат
Ийготыш шудымо икшывым йодыштмо годым ачан але аван пелен лиймыже мешаен кертеш гын, следователь тудым йодыштмашке пурташ тореш лийын кертеш. Тунам йоча вес законло представительжым ӱжыкта.
16 ийыш шудымо але ты ийготыш шушо, но психике могырым начар тазалыкан икшывым «половой неприкосновенность» манме ваштареш ышталтше уголовный дела шотышто йодыштыт гын, йоча пелен психолог лийшаш.
Ийготыш шудымо икшывым йодыштмо годым видеозаписьым але киносъёмкым ыштыман. Но икшывын але тудын законло представительжын кумылыштым шотыш налман. Возымо материал-влак уголовный дела пелен аралалтыт.