Пошкудем – моло еҥ-влак деч ойыртемалтше, илалше ÿдырамаш. Тудо мӧҥгӧ гыч лекде шып ила, нигӧ дене ок вурседыл, ок мутлане. Иктаж-мо кӱлын гын, пошкудо ватылан йыҥгыртен.
Икгана тудын дене вашлияш да кутыраш логалын. Тунам илышыже нерген пален налынам. А тидыже тыге лийын: полышкалыше пошкудо вате ӱдыржӧ деке унала каен, тунам тудо авам деке йыҥгыртен да кевытыште сатум налын толаш йодын. Авам пашаште лийын да мыйым тудын деке колтен.
Ик жап гыч мыйым омса вес велне кошкен пытыше, каҥга, тошто халатым чийыше ӱдырамаш вашлие. Тудо мыйым ӧрмалгенрак ончале да ончыко эрташ темлыш. Пӧрткӧргыжӧ эмлымверым ушештарыш. Пырдыжысе обой нарынчемын, тувраш шемемын, спирт да эм пуш нерышкем пурен кайыш. Тошто комодышто пелганде рамкыште шым ияш ӱдырым ӱдырамаш ӧндалын шога. Ты фотом шинчам кораҥдыде ончымемым тудо шекланыш да шке илышыж нерген каласкалаш тӱҥале.
Валя ака 22 ияшыж годым ӱдыр икшывым ыштен. Тудлан Маша лӱмым пуэн. Моло йоча семынак илышлан куанен кушкын. Ялысе йоча-шамыч дене чӱчкыдын ер воктенысе илыдыме пӧртыш куржталыныт. Ача-ава-влак тушко коштмыштлан нуным вурсеныт.
Тусо пöртыштö йоча-влак ятыр ӱзгарым пургедыныт. Маша ик лукышто тошто лапчык дене петырыме воштончышым муын да ӱмбачше леведышым налын шуэн. Ты воштончышышто шкенжым куанен, шымлен. Вучыдымын пӧртыштӧ йӱк шергылт каен. Йоча-шамыч, Машан пустаҥше шинчаже, ошемме ӱпшӧ, тарваныдыме капкылжым ужыныт да лӱдын лектын куржыныт. Ялысе калыкым пӧртыш ӱжын конденыт.
Валентина Михайловнан ӱдыржӧ дене лийше томашалан изиш ушыжо пудыранен огыл. Ер воктенысе пӧртыштӧ мом лиймым полиций пашаеҥ-влак икмыняр ий дене шымленыт. Азап воштончышым тӱкалымыж деч вара лиймым умыленыт. Машам психиатрический эмлымверыш колтеныт. Тылеч вара ӱдыр мутланым, шыргыжмым чарнен. Мом тунам тудо тушто ужын, тачат пале огыл. Ӱдыр лу ийым эмлымверыште эртарен, врач-влак тудлан полшен кертын огытыл.
Пошкудо ӱдырамашын тыгай илышыж нерген нимомат пален омыл. Тудым моткоч чаманенам. Тылеч вара тудын деке чӱчкыдын пурен кошташ тӱҥалынам. Умыленам авалан шке икшывым йомдараш, шучко.
Нина.
Оршанке район.