Кызыт Марий кундемыштына шуко вере корным тӧрлат. Тиде паша «Безопасные и качественные дороги» нацпроект почеш шукталтеш.
Ачалыме, ыштен шуктымо корно объектым куратор, тергыше-влак ончен лектыт, акым пуат. Нунын кокла гыч иктыже – «Марийскавтодор» ГКУ-што чоҥымо паша дене кылдалтше ик пӧлкаште тӱҥ специалистлан ыштыше, куратор Артём Олегович Ендылетов.
Марий Турек посёлкышто кушшо рвезылан корно паша йоча годсек келшен. Вет ачаже Марий Турек районышто корным чоҥымо организацийыште шофёрлан тыршен. Тусо паша, корным шарыме, тушто мо, кузе ышталтме Артёмлан оҥайын чучын, кумылым савырен. Но ик жап гыч шонымаш тудым военный корнышко шогалаш таратен. Марий Турек посёлкысо школышто 8 классым тунеммеке, рвезе Советский район Ургаш посёлкысо лицей-интернатыш кадет классышке тунемаш пурен. Тыште кум ий тунемын, но вара вес корным ойырен налын.
«Тазалыкемлан кӧра военный профессийым шым нал. Чонлан лишыл паша дене илышем кылдаш шонышым. Волгатехышке чоҥымо паша да архитектур институтышко инженер-чоҥышо специальностьым налаш пурышым. Бакалавр ден магистратурым йошкар диплом дене тунем пытаренам», – ойла А.Ендылетов.
Тӱрлӧ пашам шуктен
Артём магистратурышто тунеммыж годымак «Марий Эл Дорстрой»-ын Марий Турек филиалыштыже мастерлан пашам ыштена. Дипломым налмеке, вес паша верым кычал коштын огыл, туштак кодын. Самырык специалист кӧлан гына ыштен огыл! Корно мастер, производственный технический пӧлка инженер, инженер-геодезист лийын. Чылаже 3 ият пеле тыште мӱкш гае тыршен.
«Параньга районысо Олор – Сидыр почиҥга корнышто мастерлан ыштенам. Варажым мыйым ПТО-ш инженерлан кусареныт. Тушто, тӱҥ шотышто, ыштышаш объектлан исполнительный документацийым ямдыленам. Кок ий ты пашам шуктен тольым. Тиддеч вара инженер-геодезистлан шогальым. Вара паша корно мыйым Йошкар-Олашке наҥгайыш», – ойла Артём Ендылетов.
У верыште
Ӱмашсек тудо Йошкар-Оласе «Марийскавтодор» кугыжаныш предприятийыште пашам ышта. Тыште – у вер, вес коллектив, тыгак вес кӱкшыт. Ончыч тудо подрядчик семын тыршен гын, кызыт тудо заказчик семын ышта, манаш лиеш. Артём Олеговичын тӱҥ сомылжо – корно паша качествым тергаш, уто-ситым жапыште ужын шукташ. Куратор корным проектный документаций дене келшышын ышталтмым терга.
«Безопасные и качественные дороги» нацпроект почеш корным тергена. Мый корным приниматлем. Ончен лектын, пашалан акым пуышаш улам. Чыла шот дене ыштен шуктымо гын, актыш кидпалым пыштем. Тиддеч посна подрядчик оксам налын огеш керт. Тидыже моткоч кугу ответственность, шонем. Чыла нормативный документацийым сайын палыман.
Тергымеке, йодыш лектеш гын, подрядчиклан кушто, мом тӧрлаш кӱлмым палемдена. Нуно каласымым шотыш налын пашам ыштат, лекше уто-ситым кораҥдат», – ойла тудо.
Тӱрлӧ районышко кудалыштеш
Кураторын пашаже ятыр, тыгодым чыла ыштен шуктыман. Артём Олеговичын икмыняр районышто тергышаш объектше уло. Тушко жапын-жапын миен толеш, пашам эскера.
«Кызыт утларакшым Йошкар – Ола – Уржум, Звенигово – Шелаҥгер – Морко кугорныласе объектлаште корно тӧрлалтеш. Тений ыштышаш пашана пеш шуко. Марий кундемна мучко шагал огыл корно ачалалтеш. Южо объектым вес ийлан шукташ палемдыме гынат, тудым тенияк ышташ тӱҥалме.
Ме 5 куратор улына. Кажныжын шке тергыме объектше уло. Тений мый Курыкмарий, Советский, Параньга, Морко районлаште ышталтме корнылан вуйын шогем, варажым тергем. Сандене эре кудалыштман», – ойла Артём Олегович.
А.Ендылетовлан тиде паша келша, шуко еҥ дене вашлийын мутланыман. А яра жапше годым Марий Турек посёлкышто корно пашаеҥ-влакын чумырымо «Дорожник» футбол командыштыже модеш.
Корным ачалыше-влакым чӱчкыдын вурсат. Корно уке – пуйто нуно титакан улыт. Асфальтым шарымылан кӧра корным петырат – адакат нунын ӱмбак торжа мут чоҥешта. А машина дене тӧр, вияш корно дене ласкан кудалыт гын, шагал годым тауштен пелештат. Туге гынат нуно, нимом ончыде, шке поро пашаштым ыштат: когартыше кече йымалнат, вошт витарыше мардеж годымат. Тек умбакыжымат шке пашаштым кӱлынак шуктат да калыкым сай корно дене куандарат.