Йошкар-Олаште «Марий Эл Республикын талантше-влак» конкурс 12-шо гана эртаралтын.
Тений тудо землякна, уста композитор, элыштына кумдан палыме семмастар Андрей Эшпайын 100 ияш лӱмгечыжлан пӧлеклалтын. 1993 ий 20 апрельыште эртаралтше икымше тыгай конкурсышто Андрей Яковлевич жюри семын талантан ӱдыр-рвезе-шамычым аклен.
Тенийысе конкурсыш 160 наре йодмаш пурен, тушеч 130 еҥ конкурсышто шкенжым терген. Нуным саламлаш Марий Элысе Правительстве Председательын алмаштышыже – тӱвыра, печать да калык-влакын пашашт шотышто министр Константин Иванов ушнен.
Сеҥыше-шамычым 18 майыште Гала-концерт годым саламленыт. Уста ӱдыр-рвезе-шамычым стипендий да Марий Элысе Тӱвыра министерствын окса премийже дене палемденыт.
Марий Элысе Тӱвыра министерствын ВК-се тӱшкаж гыч налме фото.