Йошкар-Оласе Бауман лицей пеленысе «Лира» Йоча сымыктыш школын «Узоры» ансамбльыштыже шуаралтше участник-влак «Алтын-Майдан» фестивальыште лийыныт. Фестиваль Абхазийысе Сухум олаште эртаралтын.
«Узоры» ансамбль ты интернациональный культурно-просветительский фестивальын 1-ше степенян лауреатше лӱмым сулен да вокал номинацийыште «Первые из лучших» посна приз дене палемдалтын.
Марий Элын чапшым кӱшнӧ кучаш манын, ансамбльын вуйлатышыже да участникше-влак кугу пашам шуктеныт. Рпертуарлан тӱткыш поснак ойыралтын. Фестиваль кышкарыште участник-шамыч тӱрлӧ конкурсышто да тӱвыра дене кылдалтше тӱшка мероприятийышке ушненыт. Нуно этнокасыште, экскурсийыште лийыныт, СВО участник-шамычлан воинский частьыштен концертым ончыктеныт, Абхазийын шуко верлажым шымленыт, мастер-классыште моштымашыштым нӧлтеныт, Шем теҥыз воктене каненыт.
Вуйлатыше-влакын палемдымышт почеш, «Алтын-Майдан» фестивальын содержанийже моткоч поян. Тидыже калык кокласе кылым пеҥгыдемдымаште, икте-весын тӱвыражым да йӱлажым пагалымаште кугун полша. Калык муро да куштымаш гоч ты шижмашым арален кодаш йӧным ышта.