«Иле, шочмо ялем!» маналтеш чумыр Марий кундемнам авалтыше кугу фестиваль. Тудын кышкарыштыже Марий Элнан чыла районысо тӱвыра пӧрт-влак кеҥеж мучко шке вершӧрыштышт ятыр мероприятийым эртарат.
«Иле, шочмо ялем!» фестивальын тӱҥ шонымашыже: ял кеч изи, кеч кугу лийже, тушко тӱвыра пашаеҥ-влак миен шушаш да калыкым куандарышаш улыт. Тыге гына ял илыш тӱзланен кертеш. А Морко районысо Кораксола тӱвыра пӧртын тиде фестиваль жапыште эртарыме икымше мероприятийже – «Эн тале колызо» таҥасымаш. Тудым Кораксола тӱвыра пӧртын художественный вуйлатышыже В.Г.Кириллова кок чолга колызо коклаште эртарен.
Леонид Иванов ден Владимир Сергеев Раман пӱяште икмыняр шагат колым эҥыреныт. Владимир йолташыже деч 200 граммлан шукырак колым кучен. Тудын кучымо колжо ик килоат 800 граммыш шуын, а Леонидын – ик килоат 600 граммыш.
Елена Григорьева, Кораксола тӱвыра пӧртым вуйлатыше.
Снимкыште: Владимир Сергеев ден Леонид Иванов.