Эн тале, эн ушан тунемше-влак

Йошкар-Оласе шуко профилян лицей-интернатыште «УмКа» кеҥежымсе школ пашам ышта. Тушко Марий Элысе школла гыч российысе олимпиадылаште, научно-практический конференцийлаште сеҥышыш лекше, предмет-влакым келгын тунемше 96 ӱдыр-рвезе погынен.

Тений республикысе бюджет гыч ты школлан 1,2 млн теҥгем ойырымо. Икшыве-влак тыште оксам тӱлыде тунемыт. Лу кече жапыште нуно математике, химий, биологий, физике да руш йылме дене шинчымашым налыт. Тунемме деч посна йоча-влак спорт, уш-акылым пойдарыме таҥасымашлашке ушнат, экскурсий дене коштыт, оҥай еҥ-влак дене вашлийыт.

Кеҥежымсе школын эн чолга да сай лектышыш шушо участник-влаклан сертификатым кучыктат. Тудыжо Талантан йоча-влак дене пашам ыштыме рӱдерыште тунемаш йӧным пуа.

А 14 июньышто Йошкар-Оласе Экономико-правовой гимназий пелен кечывалымсе «Рост*Ок» лагерьым торжественно почмо. Тушто 15-17 ияш талантан ӱдыр-рвезе-влакым обществознаний дене российысе олимпиадышке, конкурсышко ушнаш ямдылаш тӱҥалыт, тыгак канат да тазалыкым пеҥгыдемдат.

Лагерьышке 30 йоча коштеш. Нуно конкурс ден конференцийлаште, обществознаний дене российысе олимпиадылаште сеҥышыш лекше да призёр улыт.